Qazan aýyp, qarashaǵa taıanǵanda, dúrildetip áketip, qańtarda núkte qoıatyn bıylǵy jańa jylymyz da márege jetti. Neshe túrli áshekeılermen kómkerilgen úlkendi-kishili shyrshalar kózdiń jaýyn aldy.
Biraq jyl qarsańynda bazardyń tóńiregin, dúkenniń aldyn bermegen jasyl shyrshaǵa suranys az boldy ma, álde halyq úıine kirgizip, búrin qýratyp, dalaǵa laqtyrǵandy qup kórmedi me, jasandy shyrshamen-aq sándi kirgizýge bolar dedi me, álgi tabıǵı shyrshalar túgel ótpeı, ıesiz úıilip qala berdi. Jasandy shyrshalar izim-qaıym joq. Keler jyldyń qarsańynda, olar qaıta sap túzeıtini aqıqat.
Árıne, keı azamattar ormandy tazartý úshin bosqa qalǵansha, halyqtyń bir kún bolsa da ıgiligine jaratsyn dep ákep jatyr dese, ekinshi bir jaq ormanshylarǵa qarjy túsiredi, ál-aýqatyn arttyrady degen ýájin alǵa tartady. Úshinshi top Reseıden jetkizilipti degendi tilge tıek etedi. Qalaı aıtsaq ta, Tabıǵat-Ana barlyq adamǵa ortaq. Kórshimizden soqqan taza aýa bizde de jetip jatary anyq. Iá, shyrsha – tabıǵattyń tól perzenti. Tektisi «tuqymnan» dese de bolady.
Anaý bir jyldary halqymyzdyń qadirli uly Sherhan Murtaza: «Men kórdim uzyn qaıyń qulaǵanyn, Bas uryp qara jerge sulaǵanyn... Japyraǵy sarǵaıyp, ólimsirep, Baıǵustyń kim tyńdaıdy jylaǵanyn?» degen Abaı óleńine ıyq súıep «Ormandy qorǵamasaq, ókpesiz qalamyz. Orman ketse, ylǵal ketedi. Sýsyz qalamyz. Azynaǵan jelden, sýyrylǵan qumnan kóz asha almaspyz» dep edi. Shynynda, ana tabıǵattyń emshegi ıigende shyǵatyn sý máselesi qazir ońaıǵa soǵyp turǵan joq. Bul jaıly Elbasy «Qazaqstan-2050» Strategııasynda on qaterdiń biri dep atap ótti.
Tynysymyzdy keńitetin aýanyń altyn tamyry aǵashty qorǵaý árqaısymyzdyń paryzymyz. Ol úshin birer kúngi jyltyraq úshin jasyl shyrshany jaýdaı japyrmaı, jasandy shyrshamen de ótkizip jatsaq quba-qup bolary haq. Soǵan bet burǵandyqtan shyǵar, bıylǵy qıylǵan shyrshanyń ótpeı úıilip qalyp jatqany. Aldaǵy jyldary osyny eskerip, ótpeı qalǵan shyrshanyń shyrylyn oı-sanamyzǵa túıip, Tabıǵat-Ananyń tól perzentine meıirimdilik tanytsaq, qane!
Súleımen MÁMET,
«Egemen Qazaqstan».