Múmkindigi shekteýli adamdarǵa arnalǵan respýblıkalyq áleýmettik baıqaýǵa Aqmola oblysynan qatysqan Iýlııa Gorıachevskaıa ekinshi oryndy ıemdendi. «Daryndy bastaý» atalymy boıynsha kózge túsken stepnogorlyq qyz endi EKSPO-2017 halyqaralyq kórmesine qatysatyn bolady.
Iýlııa múgedektigine qaramastan, shynydan shyraıly buıymdar daıyndaýymen el aýzyna erte ilikti. Ol joǵaryda atalǵan bedeldi baıqaýda mata jáne toqyma buıymdaryn áshekeıleýimen, shynydan jasalǵan názik kartınalarymen, tipti, shahmat fıgýralarymen talǵampaz kórermenderdi tánti etti.
Qazir Iý.Gorıachevskaıa Mádenıet jáne sport mınıstrliginiń tapsyrysy boıynsha «Memlekettik saıasatty damytý qory» QQ qolǵa alǵan múmkindigi shekteýli adamdar úshin halyqtyq jáne sándi qolóner týyndylaryn jasaý arqyly EKSPO-2017 halyqaralyq mamandandyrylǵan kórmesine qyzý daıyndalý ústinde. Aqmolalyqtar ónerli qyzdyń abyroıly saptan kórinetinine senimdi.
Baqbergen AMALBEK,
«Egemen Qazaqstan».
Aqmola oblysy.