О́ńirge ınvestor tartýǵa jergilikti bılik meılinshe yqylasty. О́ıtkeni oblysqa áleýetti ınvestor kelse, turaqty jumys orny da kóbeıedi. Sóıtip, jergilikti turǵyndardy jumyspen qamtýdyń múmkindigi molaıady. Oblys basshysynan bastap salaǵa jaýapty mamandar búginde sheteldik ınvestorlardy tartýǵa kúsh salyp jatyr.
Álbette kez kelgen ınvestor sharýashylyq júrgizýge ońtaıly bolýy úshin shıkizat qory men tasymal isi, kásiporyn ornalasatyn jerdiń ınfraqurylymy úshin yńǵaıly jer izdeıdi. О́ıtkeni ınvestor belgili bir merzimdegi perspektıvada tabys tabýdy kózdeıdi. Bul turǵydan alǵanda toǵyz joldyń torabynda ornalasqan Shý aýdany – qolaıly aımaq.
Aýdan irgesindegi Birlik aýyldyq okrýgine at basyn burǵan ırandyq ınvestor birneshe jyl bederinde jemisti jumys atqaryp júr. «KazIrAgro» JShS óndiretin maqsary maıy negizinen eksportqa baǵdarlanǵan. Seriktestik keıingi jyldary atalǵan ónimdi óńir brendine aınaldyrǵan. Júzege asyrylǵan jobanyń jalpy quny 3 mıllıon dollardy quraıdy. Kásiporynda jetpiske jeteqabyl adam eńbek etedi. Onyń jartysynan kóbi – jergilikti azamattar. О́ndiris oshaǵy tolyq qýatynda jumys istegen jaǵdaıda táýligine 3 tonna maqsary maıyn óndirýge qaýqarly.
Seriktestik basshylary birqatar Eýropa elimen tyǵyz qarym-qatynas ornatqan. Máselen, Alınagııan Hamıdrezanyń ıeligindegi kásiporyn «Safloria» ataýymen shyǵatyn ónimdi buǵan deıin Qytaı, Reseı, Nıderland, Chehııa elderine eksporttap kelgen. Qaıbir jyly Japonııa eliniń azamattary da Qazaqstanda óndiriletin maıdy satyp alý boıynsha kelisimge kelipti.
«Rasynda seriktestik óndiretin «Safloria» maıyna degen suranystyń artyp jatqany kóńil qýantady. Irandyq ınvestordyń kelýimen jandanǵan jumys búginde laıyqty túrde jalǵasyp jatyr. Máselen, 2018 jyly óndirilgen ónim kólemi 991,7 myń tonnany qurasa, 2019 jyly 1419,73 tonnaǵa jetken. Osylaısha, óndirilgen maı kólemi jyl saıyn artyp otyrǵan. Jumys barysynda kezdesken keıbir kedergiler jergilikti atqarýshy bıliktiń aralasýymen der kezinde sheshimin taýyp jatyr. Shý aýdany aýmaǵynda óndirilgen maqsary maıyn Eýropa men Azııanyń biraz eli tutynady», deıdi Shý aýdany kásipkerlik bóliminiń basshysy Jeńis Nurǵalıev.
Mamannyń deregine júginsek, 2020 jyly «KazIrAgro» ónimi Chehııa, Japonııa, Qytaı, О́zbekstan sekildi tórt memleketke jóneltilipti. О́tken jyly 360 tonna maqsary maıy Qytaı, О́zbekstan, Germanııa memleketterine eksporttalǵan.
«Jumysshylardyń ortasha jalaqysy 170 myń teńgeni qurap otyr. Kompanııanyń qýaty kúnine 9,6 tonna ónim óndirýge jetedi. Seriktestik basshylary ótken jyly 1 200 gektar aýmaqqa maqsary daqylyn ekken. «Safloria» maıynyń óńir brendine aınalǵanyn aýyz toltyryp aıta alamyz. О́ńirge kelgen árbir áleýetti ınvestor jergilikti halyqty jumyspen qamtýǵa atsalysady. Bul baǵyttaǵy jumystar aldaǵy ýaqytta da jalǵasady», deıdi J. Nurǵalıev.
Jambyl oblysy,
Shý aýdany