Atyraýlyq ǵalymdar óńirge tasqyn sýdyń kóp bóligi mamyr aıynyń basynda kelýi múmkin degen boljam jasap otyr, dep habarlaıdy Egemen.kz.
Atyraý oblystyq jedel shtab janyndaǵy zertteýshi ǵalymdardyń jumys toby sý tasqyny jaǵdaıyn baqylap otyr. Atalǵan toptyń múshesi Arman Jumaǵazıevtiń aıtýynsha, Jaıyqpen keletin mol sý mamyr aıynyń basynda ózen arnasyn tasytýy múmkin.
«Sý tasqynyna baılanysty kóp jylǵy derekterdi saraptaý, eskerý kerek. Osy turǵydan burynǵy derekterge júginsek, Atyraý oblysynyń aýmaǵyna tasqyn sýdyń kóp bóligi ádette mamyr aıynyń ortasynda kelgenin bilemiz. Biraq osy jyly Reseı Federasıasynan mol sý kelip, kóktemgi tasqynnyń erte bastalýyna sebep bolyp otyr. Batys Qazaqstan oblysynyń aýmaǵymen tómenge qaraı aqqan sý Atyraýǵa shamamen 6-7 kúnde keledi. Osyndaı boljamǵa súıensek, 2-3 mamyr kúnderi Jaıyq ózeniniń Atyraý oblysyndaǵy arnasy tolyp ketýi múmkin», deıdi ǵalym Arman Jumaǵazıev.
Oblystyq jedel shtabtyń aqparatyna qaraǵanda, búgin, 24 sáýirdegi tańerteńgi saǵat 08:00-de Jaıyq ózeniniń deńgeıi Inderbor kentiniń tusynda 597, Mahambet aýylynda 715 santımetrge jetken. Al Atyraý qalasyndaǵy gıdrobekette 422 santımetrge jetti.
«Atyraýda Jaıyq ózeniniń qaýipti deńgeıi – 5 metr 50 sm. Sý tasqynynyń qaýpine baılanysty 24 sáýirge deıin Atyraý qalasyndaǵy Jaıyq ózeniniń jaǵalaýyna 229,6 shaqyrym bóget turǵyzyldy», dep habarlady oblystyq jedel shtab ókilderi.