ShQO polıseıleri jedel-izdestirý jumystary barysynda esirtki jarnamalady degen kúdikke ilingen erli-zaıyptylardy ustady, dep jazady Egemen.kz.
Olar О́skemende esirtki zatyn satýmen aınalysatyn saıttardyń qaǵazdaryn japsyrýmen aınalysqan.
Jedel ýákilder kúdiktilerdi qylmys ornynan ustaǵan. Zattaı dálel retinde 41 jastaǵy er adam men onyń 28 jastaǵy jubaıynan esirtki jarnamasynyń japsyrmalary tárkilengen.
Kúdiktilerdiń aıtýynsha, olar bul qaǵazdar arqyly esirtki zattaryn jarnamalaǵandary týraly bilmegen. Áıel adam bul «tapsyrmany» jumys berýshiden alǵanyn, ol oǵan broshıýralardy qala boıynsha japsyrý kerek ekenin túsindirgen. Kelinshek bul jumysqa óziniń kúıeýin de tartqan.
Qazirgi ýaqytta kúdiktilerge qatysty esirtki, psıhotroptyq zattardy, olardyń analogtaryn tutynýǵa kóndirgeni úshin qylmystyq is qozǵaldy.
Aıyby dáleldengen jaǵdaıda erli-zaıyptylar tórt jylǵa deıin bas bostandyǵynan aıyrylýy múmkin.