Jańa jyl qarsańynda halyqtyń saýda oryndary men dúken, bazar jaǵalaıtyny, dastarqanǵa mol azyq-túlik tasıtyny belgili. Osyny eskergen óńir basshylyǵynyń uıytqy bolýymen О́skemendegi «Fresh market» fermerlik gastronomynyń janynda Tarbaǵataı aýdanynyń azyq-túlik jármeńkesi ótti.
Mal sharýashylyǵymen aınalysatyn tarbaǵataılyqtar jármeńkege 47 bas iri qara, 83 bas qoı, 1 túıeniń etin ákelgen eken. Sondaı-aq, Zaısan kólinen Tuǵyl aýylynyń turǵyndary aýlaǵan 1,5 tonna balyq jetkizildi. Odan bólek 50 lıtr qymyz, 50 kılodan astam sary maı, qurt-irimshik, aıran sııaqty sút ónimderi de sórege qoıyldy. Aıta ketken abzal, jármeńkedegi azyq-túlik bazar narqyna qaraǵanda 30-40 paıyzǵa deıingi tómen baǵamen satyldy.
– Jármeńkede sıyr eti 700 teńgeden satylyp jatyr. Bazarda 1200-1300 teńgege satylatynyn eskersek, bul – ájeptáýir tómen baǵa. Qymyzdyń lıtri 300 teńgeden satyldy. Bazarda kem degende 600 teńgeden baǵalanady. Sondyqtan, munda barlyq taýardy halyq birden satyp alyp ketedi, – deıdi qala turǵyny Nadejda Vasılevna.
Shynynda, tań atpaı jármeńkege aǵylǵan jurttyń qarasy qalyń edi. Tús aýa fermerler barlyq ónimderin satyp bolǵandaryn aıtty.
– Jármeńkede 22 mıllıon teńgeniń ónimi satyldy. Oǵan 17 aýyldyq okrýg pen 54 sharýa qojalyǵy qatysty, – dedi Tarbaǵataı aýdanynyń ákimi Dildábek Orazbaev.
Dýman ANASh,
«Egemen Qazaqstan».
Shyǵys Qazaqstan oblysy.