Jambyl oblysy ákimdigi jastar saıasaty máseleleri basqarmasynyń uıymdastyrýymen óńirdiń 85 jyldyǵy aıasynda «Jyr jaýhary» atty poetıkalyq dýel ótkizildi. Jergilikti jas aqyndardyń basyn qosqan is-shara sońǵy birneshe jyldyń bederinde turaqty túrde ótkizile bastaǵany kóńil qýantady.
О́ńir jastarynyń poezııa merekesi birneshe kezeńdi qamtydy. Áýeli ótinish bildirgen otyzǵa jýyq jas talanttyń shyǵarmalarymen tanysqan qazylar alqasy olardyń ishinen on alty myqtyny iriktep, fınaldyq kezeńge ótkizdi.
Qara óleńniń qasıetin tereńnen túsingen on altynyń basym kópshiligin osal dep aıta almaısyń. Árıne, ishinde birdi-ekili óleń jazýdy mashyqqa aınaldyryp, tehnıkany meńgerip alǵandar bar. Al qalǵandarynyń jazbasynan kórkem ádebıettiń elementterin aıqyn baıqaısyń. Osyǵan qarap-aq aqyn atymen atalatyn óńirde poezııanyń kórkemdik deńgeıi joǵary ekenin ańǵarý qıyn emes.
Úzdik on alty aqyn bastapqyda segiz jupqa juptaldy. Oza shapqandary júldeli oryndarǵa talasý úshin ekinshi kezeńge joldama aldy. Olardyń qatarynda talaı jyr báıgesinde oza shapqan Danııar Álimqul, Araıly Jaqsylyq, Ǵaınıken Maraltaıqyzy sekildi esimi elge tanys aqyndar da bar.
Poetıkalyq dýelde ádemi tirkesterimen, tosyn teńeýlerimen ózgelerden daralanǵan Qazaqstan Jazýshylar odaǵynyń múshesi Danııar Álimquldyń óleńderi kórermendi beıjaı qaldyrǵan joq.
«Bir tilegim bar edi qaıta mazdap,
Kelem taǵy...
qustar da qaıtady azdap.
Seniń kúlkiń shashylǵan kóshelerdi,
Meniń múlkim dep elge aıta jazdap»,
dep jyrlaǵan jas talaptyń shyǵarmalaryna qoshemet kórsetkender az bolǵan joq.
Jańa formatta ótken is-shara qorytyndysynda talastyq aqyn Danııar Álimqul top jarsa (syıaqysy 500 myń teńge), jýalylyq Araıly Jaqsylyqqa ekinshi oryn (300 myń teńge) buıyrdy. Tarazdyq Ǵaınıken Maraltaıqyzy men Jumataı Kóksýbaı úzdik úshtikten (200 myń teńge) kórindi.
«Jańa formatta ótkizilip jatqan «Jyr jaýhary» poetıkalyq dýeline qatysýshylardyń qarasy kóp boldy. Júlde qory ótken jylǵa qaraǵanda qomaqty bolǵany da áser etken shyǵar. Eń bastysy osy is-sharaǵa qatysqan aqyndardyń deńgeıi ósip kele jatqany qýantty», deıdi oblys ákimdigi jastar saıasaty máseleleri basqarmasynyń basshysy Jomart Zulpyhar.
Dýel formatynda ótkizilgen ádebı is-shara óz maqsatyna jetti. Bir jaqsysy, ádebıetke, poezııaǵa ańsary aýǵan jastardyń qatary kóbeıipti. Muny kórermen retinde qatysqan azamattardyń áńgimelerinen de baıqadyq. Ár qatysýshynyń óleńine qatysty baıypty oılaryn aıtyp otyrǵandardyń kóbeıgeni rasynda da deńgeıdiń óskenin kórsetse kerek.
«Bul – poezııa merekesi. Almatydan Tarazǵa oralǵandaǵy basty maqsat dýelde mindetti túrde top jarý emes. Qatarlastardyń óleńin tyńdaǵym keldi. Jańa esimderdi kezdestirsem degen nıetpen qatystym. Sol maqsatymnyń údesinen shyqqan sııaqtymyn», deıdi júldegerlerdiń biri Araıly Jaqsylyq.
Taraz