Oblys ortalyǵyndaǵy Jappasbaı batyr kóshesi boıynan salynǵan kópqabatty úıden 150 otbasyǵa páter kilti tabystaldy. Jurtshylyqtyń kópten kútken qýanyshyna ortaqtasyp, tilek qosqan oblys ákimi Nurlybek Nálibaev halyqty baspanamen qamtý Memleket basshysynyń nazarynda turǵan másele ekenin atap ótti.
– Halyqtyń az qamtylǵan tobyna baspana berý, qamqorlyq kórsetý – elimizdiń áleýmettik-ekonomıkalyq damý baǵdarynyń negizgi basymdyǵy ekenin bilesizder. О́tken jyly aımaqta 4 108 páterlik 300 turǵyn úı salyndy, 2 400-ge jýyq páter tabystalyp, 11 myńnan asa turǵyn baspanaǵa qol jetkizdi. Bıyl bıýdjet qarajaty esebinen 13,3 mlrd teńgege 1 269 páterlik 67 turǵyn úı qurylysy júrgiziledi. Jyl basynan beri 252 otbasyna páter kiltin tabystaǵan edik. Búgin solardyń qataryn 150 úıelmen toltyryp, qonystoıyn toılaıdy. Alda «Syr jastary» jeńildetilgen ıpotekalyq nesıe baǵdarlamasymen taǵy da 60 shaqty jas otbasy baspanaly bolady, – dedi oblys ákimi.
Osy joly páterler múgedektigi bar azamattarǵa, tolyq emes otbasylarǵa, jetim balalarǵa berildi. Jańa 60 jáne 90 páterlik kópqabatty turǵyn úılerdi «Sát Servıs» jáne «SK Dáneker» seriktestikteri saldy. Qonystoı ıeleri atynan Aısulý Oshpanova qýanyshyn jetkizse, qurylys salasynyń ardageri Aqmurat Madııarov bata berdi. О́ńirdiń áleýmettik-ekonomıkalyq damýyna úles qosqan turǵyndar men qurylysty sapaly salýǵa atsalysqan merdiger mekeme qyzmetkerleri de marapattaldy. Búginde Qyzylorda qalasy men aýdandarda boı kótergen áleýmettik nysandardyń sáýletti, sapaly jáne úılesimdi bolýyna basa nazar aýdarylyp keledi. Qurylysqa qoıylatyn talaptardyń buljytpaı oryndalýy da qatań baqylaýda tur.
Jalpy, oblysta qurylys qarqyndy júrip jatyr. Qalanyń sol jaǵalaýynan 300 oryndyq jataqhanasy bar 400 oryndyq fızıka-matematıka mektep-ınternaty boı kóterip keledi. Osy aýdannan tarıhı-ólketaný mýzeıi ǵımaratynyń irgesi qalanar kún de alys emes.
Memleket basshysynyń bastamasymen qolǵa alynǵan «Jaıly mektep» ulttyq jobasy aıasynda bıyl 10 mektep el ıgiligine tabystalady, taǵy 11-iniń qurylysy bastalady. Balalar men jasóspirimder shyǵarmashylyǵyn ushtaıtyn «Shyǵarmashylyq akademııasy», Jańaqorǵan, Shıeli aýdandarynda Oqýshylar úıi men О́ner mektepteri salynady.
Qyzylorda