Qazir qaısysymyz bolsyn Ádiletti Qazaqstan tezirek ornasa eken dep tileıtinimiz anyq. Endeshe, osy atam zamannan ańyz-ertegige arqaý bolǵan asyl armandy Memleket basshysy aıqyn maqsat etip alǵa qoıǵan qazirgi kezde ony júzege asyrýǵa bárimiz birdeı atsalysýymyz qajet emes pe?
Bul rette Prezıdent Qasym-Jomart Toqaevtyń Ulttyq quryltaıdyń Atyraýda bolǵan úshinshi otyrysyndaǵy: «Men Memleket basshysy retinde Ádiletti Qazaqstandy qurýdy ózimniń basty mindetim dep sanaımyn. Prezıdent bolyp saılanǵan alǵashqy kúnderden bastap ádildik qaǵıdasyn qatań ustanyp kelemin. Bul ıdeıa 2022 jyly qyrkúıekte jarııalanǵan Joldaýymda tolyqqandy tujyrymdama retinde kórinis tapty. Osy oraıda «ádildik» uǵymynyń saıası rıtorıkada jáne tájirıbede qoldanylýy belgili bir syn-qaterler týyndatyp, azamattardy shamadan tys úmittendirip, olardyń bılikke talabyn kúsheıte túsýi múmkin degen pikir bar. Menińshe, bul ádildik uǵymynyń aıasyn taryltady, jurt ony ıgilikter men resýrstardy teń bólý dep qana qabyldaıdy. Shyn máninde, ádildik – eń aldymen, jurttyń bárine birdeı quqyq berý jáne jaýapkershilikti barshaǵa teń júkteý degen sóz. Ádildik pen jaýapkershilik – tyǵyz baılanysty uǵymdar. Basqasha aıtsaq, jaýapkershilik bolmasa, ádildik te bolmaıdy. Árkim óz isine, mindetine jaýapkershilikpen qarasa, jeke azamat ta, búkil el de tabysqa jetedi. Ádildiktiń qýaty osynda», degen sózi oıǵa oralady.
О́kinishke qaraı, otandastarymyzdyń birazynyń boıynda naq osy qasıet – jaýapkershilik jetispeıtinin kúndelikti ómirde kózimizben kórip, kóńilimiz túsip júr. Jaýapsyzdyq – bıylǵy alapat sý tasqynyna jol bergen joǵary laýazymdy sheneýnikterden bastap, qarapaıym azamattarǵa deıin kesel bolyp jabysqan keleńsiz qubylys.
Jýyrda bir sharýamen elordadan Kókshetaý qalasyna baryp-qaıtýǵa týra keldi. Sol úshin «Indraıver» qosymshasy arqyly Q. degen taksı júrgizýshisimen aldyn ala kelisip, erteńgi saǵat 9.00-de jolǵa shyǵatyn boldyq. Alaıda Q. ýádeli ýaqytta kelmegen soń, oǵan eki ret telefon soqtym. Biraq ol qońyraý baryp tursa da, jaýap bermedi. Arada bir saǵatqa jýyq ýaqyt ótkende ózi telefon shaldy. «Keshe keshke sizden basqa, ýaǵdalasqan jolaýshylarym saparǵa shyǵýdan bas tartqan soń, búgin Kókshetaýǵa barmaıtyn boldym», dedi uıqyly-oıaý kúıde. Bul jaıly maǵan nege ýaqtyly habarlamaǵan sebebin aıtyp, keshirim suraý oıyna da kirmegen tárizdi. Sol sátte keshe keshke meniń «Indraıverge» kirip, tapsyrys jasaǵanymdy kórgen talaı taksı júrgizýshisi habarlasyp, áldeqaıda qolaıly usynys jasasa da: «Q. degen taksıshige ýáde berip qoıdym. Ýáde – Qudaı sózi», degen ýáj aıtyp, bárinen bas tartqanyma barmaǵymdy tistedim. Oılap kórsem, Q.-ǵa da, ózge taksıshilerge de: «Qaısysyńyz erteń dál saǵat 9.00-de úıimniń aldyna kelip turasyz – sonyń kóligine minemin», dep aıtýym kerek bolǵan eken...
Sodan «Indraıver» arqyly taǵy kólik izdeýge kiristim. Ile E. degen taksı júrgizýshisi jap-jańa sheteldik avtomobılimen jetip keldi. Kókshetaýdaǵy baratyn ornyma saǵat 14.00-ge deıin jetkizýge ýáde berdi. Alaıda jol boıy qasyna otyrǵyzyp alǵan 12-13 jasar nemeresimen qaljyńdasýmen jáne uıaly telefonymen áldekimdermen sóılesýmen bolyp, júrisi óne qoımady. Shýchınsk qalasyna kireberistegi aqyly jolmen júrgeni úshin aqy alý pýnktine kelgende búginde kólik júrgizýshileriniń kóbi paıdalanyp júrgen qolaıly múmkindikti qoldanyp, arnaýly shotqa aldyn ala aqsha aýdaryp qoımaǵandyqtan, «Kaspi.kz» qosymshasy arqyly tólem jasaıyn dese, ınternet jelisi istemeı qalyp, al qolma-qol aqshamen esep aıyrysaıyn dese, qaltasyndaǵy tıyn-tebeni jetpeı, sasqalaqtap, ne isterin bilmeı edáýir daǵdardy. Sodan soń bizge, kabınadaǵy jolaýshylarǵa burylyp, qolma-qol aqshamyz bolsa, berýdi surady. Ondaı aqsha menen ǵana tabylyp, 2 myń teńgelikti qolyna ustattym. Sóıtip, aqy alý pýnktinde 5 mınýttaı bógeldik. Sonyń saldarynan E. maǵan bergen ýádesin oryndaı almaı, Kókshetaýǵa saǵat 14.10-da áreń jetkizdi. Men qatysatyn is-shara dál ýaqytynda bastalyp ketken eken, uıattan qysyla-qymtyryla kirip, kópshilikten keshirim suraýyma týra keldi.
«Indraıvermen» ıtshilegen sol sapardy sirá da umyta qoımaspyn.