Aınalany taza ustaý tabıǵatty aıalaý – parasattylyq úlgisi. Qorshaǵan ortaǵa qamqorlyq qoǵamdy qashannan beri ilgeri bastaıtyn izgi amaldyń biri bolyp keledi. Tabıǵat adamzatqa berilgen amanat bolǵandyqtan, buǵan qııanat qylmaı, barynsha qamqor bolý jaǵyna basymdyq berý kerek ekeni anyq. Osyndaı janashyr nıetten týǵan bastamanyń biri – «Taza Qazaqstan» ekologııalyq aksııasy.
El kóleminde 8 sáýirden bastalǵan tazalyq naýqany 5 aptaǵa sozylady. Ár aptanyń óz taqyryby men maqsaty da belgilengen. Osy aptada «Jasyl aımaq» aptalyǵy qorytyndylanyp jatyr. 20-27 sáýir aralyǵyn qamtyǵan bul kezeńde kóshetter egilip, aǵashtardy aqtaýǵa den qoıyldy. Al buǵan deıin aınalamyzdy, aýlalardy tazalaýǵa shaqyrǵan «Taza ólke» jáne tarıhı-mádenı eskertkishter aýmaǵyn abattandyrýdy maqsat tutqan «Kıeli meken» aptalyqtary ótti.
Ekologııalyq aksııaǵa elimizdiń barlyq óńiriniń turǵyndary belsendi atsalysyp jatyr. Bul rette keıbir óńirlerde azamattardy yntalandyrý maqsatynda qosymsha is-sharalar da qolǵa alynǵan.