О́ńirde Memleket basshysynyń bastamasymen qolǵa alynǵan «Taza Qazaqstan» aýqymdy respýblıkalyq ekologııalyq aksııasy jalǵasyn taýyp jatyr.
«Jasyl aımaq» aksııasy aıasynda aqmolalyqtar kóshet otyrǵyzyp, uıymshyldyqpen jumys istep, senbilik uıymdastyrdy. Is-sharaǵa belsendi jastarmen qatar, kóptegen óńir turǵyny atsalysty. Kóp kómegin eksheıtin derek keltiretin bolsaq, ıgilikti iske 62 myńnan asa adam qatysqanyn aıtýǵa bolady. Jasyl jelek jamylǵan kórikti Kókshe óńiriniń sán-saltanaty burynǵydan da ajarlana túsetin boldy.
Kóppen birge taıaýda ǵana náresteli bolǵan jas otbasylardyń qolyna kúrek ustap, úmitti dúnıege atsalysyp júrgenin kórgende kóńildi qýanysh kerneıdi eken. Balapan aǵashtar ata-ana qushaǵyndaǵy nárestelerimen birge ósip, jetiletini qandaı ádemi! Olar «Sábı» alleıasyna 30 ataýly aǵash otyrǵyzdy. Balaýsa qaraǵaılardy kópbalaly Ámirhanovtar otbasy da otyrǵyzdy.
– Bizdiń otbasymyzdyń jadynda qalady. Biz bul aǵashtardy otyrǵyzyp qana qoımaı, ekologııalyq tárbıeniń mańyzdylyǵyn úlgi etip kórsetkimiz keledi. Úlken balalarymyz alleıaǵa kelip, kóshetterge sý quıyp, kútip-baptaýdy umytpaıdy, – dedi Aqtoty Ámirjanova.
Kókshetaý qalasynda 8 myńǵa jýyq adam osy aksııaǵa qatysty. Olardyń kúshimen 3 500 tekshe metr qoqys shyǵarylyp, myńdaǵan aǵash kósheti otyrǵyzyldy.
Oblystyq jastar-resýrstyq ortalyǵynyń uıymdastyrýymen ótkizilgen is-shara sheńberinde aǵash kóshetterin otyrǵyzý jumystary júrgizildi. Is-sharanyń negizgi maqsaty – qala turǵyndarynyń, ásirese jastardyń ekologııalyq mádenıetin arttyrý, «Adal adam – Adal eńbek – Adal tabys» tujyrymdamasy negizinde patrıotızm, tabıǵatqa, qorshaǵan ortaǵa uqypty qaraý qundylyqtaryn dáripteý.
– Aksııanyń árbir aptasy arnaıy taqyryptarǵa arnalǵan edi. Mine, úshinshi aptada «Jasyl aımaq» aksııasy ótkizilip jatyr. Bul kúnderi aǵash kóshetterin otyrǵyzý, aınalany ákteý jumystary júrgizilýge tıis. Aldaǵy ýaqytta «О́negeli urpaq» aksııa aıasynda ardagerlerdiń aýlasyn tazalaý, qarttar úılerinde abattandyrý jumystaryna úles qosý negizgi maqsattardyń biri bolmaqshy. Odan soń «Móldir bulaq» ataýymen ótetin aıtýly iste ózen-kólderdiń mańaıyn qoqystan tazalaý uıymdastyrylady, – deıdi ortalyq basshysy Dastan Ermekov.
Aksııa barysynda 15 gektar aýmaqtyń 2 gektaryna 9 myńǵa jýyq aǵash kóshetteri otyrǵyzyldy. Aǵash otyrǵyzý jumystary Aqmola oblysy orman sharýashylyǵy basqarmasy jáne qala stýdentterimen birlesip, odan ári jalǵasa beredi.
Kókshetaý