Dana halqymyz «Balanyń oıynyn baq» dep beker aıtpaǵan. Kishkentaıynan qorapshalardy buzyp, qaıta quraýǵa áýes Oljas ony kásipke aınaldyratyny týraly oılap ta kórmegen. Búginde Shonjy aýylynda turatyn Oljas Qanatov orda buzar otyzǵa taıaǵan shaǵynda aǵash sheberi atanyp júr. Onyń qolynan shyqqan buıymdary dastarqannyń kórkin kirgizýmen qatar, kóptiń qyzyǵýshylyǵyn týdyrady.
Aǵash taqtadan (faner) tórt buryshty pishinde keptirilgen jemis salýǵa qolaıly qorapshalar jasap, ony ınternet-dúken arqyly satyp, kásip kózin tabý týraly bólesiniń usynysyn qabyl alyp, nar táýekelge bel býady. Densaýlyǵyndaǵy kináratty alǵa tartyp, qol qýsyryp otyrý Oljasqa tán qasıet emes. Taǵdyrdyń aýyrtpalyǵyna moıymaı eńbek etip, ata-anaǵa septesip, otbasyn asyraý – azamattyq paryzy. Osy jolda oqyp-toqyp, izdendi.
Almaty qalasyndaǵy estý qabileti tómen balalarǵa arnalǵan №5 arnaıy mektep-ınternatta oqyp, bilim alǵan jas talant Almaty memlekettik polıtehnıkalyq kolledjin támamdaǵan. Jastaıynan sportqa jaqyn Oljas Qazaq sport jáne týrızm akademııasynyń túlegi atanady. Aladop teýip ósken ol kishkentaıynan fýtbolshy bolýdy armandaǵan eken. Fýtbol jarysyna qatysyp, elimizdiń kóptegen qalasynda bolǵanyn maqtan etedi. Estý qabileti tómen ulttyq qurama sapynda qyzyqty oıyn órnegin kórsetken sátteri kúni keshe sııaqty edi. Qazir de Almaty qalasy atynan jarystarǵa ara-tura shaqyrtý alyp turady. Alaıda aýyl alysta bolǵandyqtan ár kez qatysýdyń múmkindigi bola bermeıdi.
Tula boıy tuńǵyshynyń kemistik kórmeýine kúsh salǵan ata-anasynyń barmaǵan jeri, ashpaǵan esigi qalmaǵan. Alaıda esh nátıje bolmaǵan soń Oljas Qanatovqa 3-dárejeli múgedektik taǵaıyndalǵan. Júrekke salmaq salsa da ulyna jan jarasyn sezdirmeı, demeý bolýǵa daıar ákesi Oljastyń ıkemdi kásibin ilgeriletýine demeýshilik jasaıdy. Úıiniń irgesindegi úıshikteı bólmege aǵash tiletin stanok qoıyp, qorapshalar jasaýyna qolaıly jaǵdaı jasap bergen. Al anasy men jan jary Baǵlan daıar bolǵandaryn laktap, jınap, taksımen qalaǵa jóneltýdi mindetine alǵan.
– «Án aıtsań da, janyńdy jep aıtasyń» demekshi, kásippen aınalysýdyń qıyndyǵy az emes. Sol sebepti qolynan is kelip, alǵa umtylyp turǵan ulymyzǵa ákesi, baýyry bolyp jabyla qolǵabys jasaýǵa jumyldyq. Bastapqyda aǵash jumysyna kerek-jaraǵyn alyp berdik. Sodan keıin kásipkerlikti qoldaý boıynsha oqyp, arnaıy sertıfıkat alyp, sonyń negizinde 583 000 teńge memlekettik qaıtarymsyz grant aldy. Sol aqshanyń ústinen óz qarjymyzdy qosyp, 1 mln 350 myń teńgege jazý jazatyn lazerlik stanok alyp berdik. Osylaısha kásibin bastady. Jumystyń jeńili joq. Tabysqa jetý úshin tabandylyq kerektigin ulymyz da úırendi. Sonyń nátıjesinde úsh jyl buryn bastaǵan kishkene kásibi turaqty tabys kózine aınalyp, otbasyn asyrap otyr, – deıdi anasy Elmıra Tyshtybaeva.
Otyzynda orda buzýǵa umtylǵan Oljastyń eńbek ónimdiligi eselene túskeni anyq. «Jidek» degen brendtik belgisi bar keptirilgen jıdektiń san túrin salýǵa arnalǵan tabıǵı taza qorapshalardyń 250-300-in on kúnniń ishinde jasap shyǵarýǵa ábden tóselgen. Osynshama zattyń taqtaıshalaryn qıyp, qurastyryp, daıyn ónimdi jınaýǵa jumys orny tarshylyq etip otyr.
Múgedektigine qaramaı eńbek etip otyrǵan kásip ıesiniń aldaǵy armany – sehtyń aýmaǵyn keńeıtip, zamanaýı stanoktar qoıyp, jumys kólemin arttyrý, iske beıim aýyl azamattaryn jumyspen qamtý, otandyq ónimdi kóbeıtý. О́mirlik qosaǵy Baǵlan Talǵatqyzy da ismerlikti meńgergen eken. Ol da óndiristik is mashınasyn alýdy armandaıdy. Eki júrektiń nıeti bir – ortaq kásipterin keńeıtý.
– Joǵary bilimim bolsa da bizdiń aýylda deneshynyqtyrý páninen sabaq bere almaımyn. Sebebi men sabaq beretindeı arnaıy mektep joq. Qulaǵymnyń estimeıtinine baılanysty qalaǵan jerde jumys isteı almaımyn. Sondyqtan kóp ýaqyt jumyssyz úıde otyrdym. Otbasyn qurǵannan keıin qarjylyq qıyndyq týdy. Kelinshegimmen dosymyzdyń toıynda tanystyq, ol da ózim sııaqty múmkindigi shekteýli jan, ekeýmiz ym-ıshara tili arqyly sóılesemiz. Shańyraq kótergenimizge bıyl 4 jyl tolady. Alǵashqy kezde otbasym kómektesti, ásirese, ákem. Ol qajet quraldardy taýyp berip otyrdy, alǵashqy fanerdi kesýge qajet almas arany ákem ekeýmiz qoldan jasadyq, keıin tapqan tabysyma elektrli túrin satyp aldym. Barlyq jumystyń óz qıyndyǵy bar, dese de men úshin fanerdi kesý, ólsheý, qurastyrý aýyr boldy. Sosyn almas ara – óte qaýipti tehnıka. Onymen jumys isteýde óte muqııat bolý kerek. Bir kúni bir kompanııa 500 qorap daıyndaýǵa tapsyrys berdi. Ýaqyty óte qysqa edi. Tańǵa deıin jasap, áreń ótkizdik. Tapsyrys beretin kompanııa Almatyda bolǵandyqtan jetkizý de qıyn boldy. Túnimen taksıge artyp áreń úlgerdik. Biraq túgel ótkizip, aqshasyn alǵan kezde qatty qýandyq, – deıdi Oljas.
Elektrli stanoktar isten shyǵyp qalsa, ony jasaýǵa arnaıy mamandy Almatydan shaqyratyn kezderi de bolady. Keıde tipti aýylda faner tabylmaı qalǵan kezderi tapsyrysty toqtatpaý úshin 60 shaqyrym jerdegi Jarkent qalasyna deıin izdep sabylǵan. Sondaı-aq ol 5 mıllıondyq grantqa qatysqanymen, ony jeńe almaǵanyna qynjylys bildirdi.
– Tapsyrys qys aılarynda, ásirese, meıram kezderinde jaqsy túsedi. Qys mezgilinde ortasha tabysym jarty mıllıonǵa jýyqtaıdy. Jaz aılarynda báseńsip qalady. Sondyqtan qosymsha tabys kózi retinde jıhaz qurastyrý, keıde saýda oryndarynda qara jumyspen aınalysamyn. Al aýylda áıelime jumys bolmaǵandyqtan ol qaladaǵy jumystardy jaǵalaıdy. Qyzymyz ósip kele jatyr. Balamyzdyń bolashaǵyn oılaımyz. Baqytty bolýyna jaǵdaı jasaǵymyz keledi, – deıdi ol.
Almaty oblysy