Májilis spıkeri Erlan Qoshanovtyń tóraǵalyǵymen bıýro ótip, aldaǵy jalpy otyrystyń kún tártibi naqtylandy.
Depýtattardyń talqylaýyna esirtki, psıhotroptyq zattardyń jáne olardyń prekýrsorlarynyń zańsyz aınalymyna qarsy is-qımyl máseleleri boıynsha ózgerister men tolyqtyrýlar engizý týraly zań jobasy birinshi oqylymda usynylady.
Zań jobasynda Qylmystyq, Qylmystyq-prosestik kodeksterge jáne «Halyq densaýlyǵy jáne densaýlyq saqtaý júıesi týraly» kodekske, sondaı-aq birqatar zańǵa ózgerister engiziledi. Atap aıtqanda, prekýrsorlarmen jáne kúshti áser etetin zattarmen jumys isteý qaǵıdalaryn saqtaý mindetine kiretin adamdar úshin osyndaı qaǵıdalardy buzǵany úshin qylmystyq jaýapkershilik engiziledi. Sonymen qatar Memleket basshysynyń 2024 jylǵy 15 naýryzdaǵy Ulttyq quryltaıdyń úshinshi otyrysynda bergen tapsyrmasyn oryndaý maqsatymen depýtattar esirtki zattaryn zańsyz óndirý úshin jaýapkershilikti qataıtýǵa baǵyttalǵan túzetýlerdi engizdi.
Jalpy otyrystyń kún tártibiniń jobasyna birinshi oqylymda memlekettik statıstıka jáne derekterdi basqarý máseleleri jónindegi zań jobasy da engizildi.
Parlament depýtattary ázirlegen zań joba Ulttyq statıstıka bıýrosy men Sıfrlyq damý, ınnovasııalar jáne aeroǵarysh ónerkásibi mınıstrliginiń derekterdi basqarý saıasaty salasyndaǵy ókilettikteri men quzyretterin bólý, Bıýro qyzmetin sıfrlandyrýǵa jáne ony memlekettik organdar bazalarymen ıntegrasııalaýǵa, sondaı-aq ákimshilik jáne balamaly kózderden derekterdi jınaý ádisterin jetildirýge baǵyttalǵan.
Májilis Qytaı Halyq Respýblıkasymen halyqaralyq avtomobıl tasymaldary týraly kelisimdi ratıfıkasııalaý týraly jáne ishki ister organdarynyń qyzmeti salasyndaǵy normalardyń artyq (shamadan tys) zańnamalyq reglamenttelýin bolǵyzbaý máseleleri boıynsha ózgerister men tolyqtyrýlar engizý týraly zań jobalaryn jumysqa alady.