Qazaqstan halqy Assambleıasy Aqmola fılıalynyń janyndaǵy jastar assambleıasy basyn biriktirip otyrǵan 140 erikti, stýdentter men túrli mekeme qyzmetkerleri ortaq iske jumyla kiristi. Tutastaı alǵanda 600-ge jýyq adamdy ekshep alyp, ortaq iske jumylǵan jandar aq nıetterimen qam kóńilderdi jadyratyp júr.
Bıyl 29 naýryzdan bastap oblys ortalyǵyndaǵy Dostyq úıiniń janynan «Jomart jan» ortalyǵy jumys isteı bastaǵan edi. Ortalyq kúni búginge deıin 210 muqtaj otbasyna kómek qolyn sozdy. Sý tasqynynan zardap shekkenderge jalpy quny 800 myń teńge bolatyn azyq-túlik, tósek oryn jabdyqtaryn jetkizdi. «Sangı-Kabýd» tájik ulttyq mádenı ortalyǵy oblys ortalyǵynyń qyzyl sý basqan kóshelerin tazalaý úshin bes tehnıka bóldi. Qala irgesindegi topan sýdan taqsiret tartqan Qyzyl juldyz aýlyna azyq-túlik, dári-dármegin jetkizip berip, alǵys arqalap qaıtty. Etnomádenı ortalyq Qylshaqty ózeniniń jaǵalaýyn bıiktetetin qum salǵan qaptardy daıyndady. Lyqsyǵan sýmen alysyp júrgen qutqarýshylar men eriktilerdi sý ótkizbeıtin kıimdermen qamtamasyz etip, ystyq astan dám tatyrdy. Kóktemgi sý tasqynynan zardap shekken aýdandarǵa quny 400 myń teńge bolatyn turmystyq hımııa zattaryn jóneltti. Túgel esepteseńiz, járdem kólemi 6,4 mln teńgeni quraıdy.
«Manas» qyrǵyz etnomádenı birlestigi 1,5 mln teńgeniń tósek orny men balalarǵa qajetti zattardy usyndy. «Barı» armıan etnomádenı birlestigi 3 aýyr júk kóligi men 2 ekskavatoryn berip, kómek qolyn sozdy. Olar da 3,1 mln teńgeniń járdemin jasady. Chývash, ózbek etnomádenı ortalyqtary zardap shekkender men qutqarýshylarǵa 800 myń teńgeniń azyq-túligin jetkizip, ystyq tamaqpen qamtamasyz etti. Oblystyq máslıhattyń depýtattary, Qazaqstan halqy Assambleıasy Aqmola fılıalynyń músheleri jalpy quny 2,5 mln teńge bolatyn 1840 kg azyq-túlik jetkizse, «Amanat» partııasynyń músheleri turmystyq buıymdaryn usyndy.
Jaqsy isten jalpy jurt ta shet qalǵan joq. Kókshetaý qalasynyń qarapaıym turǵyndary hal-qaderinshe qarajat jınap, kúndelikti asa qajetti taýarlarmen qamtamasyz etti.
Halyq kóńili kól emes pe? Eń bastysy – ystyq júrektiń sharapaty. Qorǵa jınalǵan qyrýar dúnıe kóbirek zardap shekken Atbasar aýdanyna jóneltildi. Almaty qalasynan «Atasu» qaıyrymdylyq qory jibergen 5 mln teńgeniń 11 tonnalyq júgi jetkende, kóńil bir demdelip qaldy. Gýmanıtarlyq kómektiń bir parasy Jaqsy aýdanyna joldandy. Dál osyndaı kómek Atbasar, Astrahan, Esil jáne Jarqaıyń aýdandaryna jóneltildi. Jalpy quny 4 mln teńgeniń shamasynda.
Tabıǵattyń tarpań minezi saldarynan qıyndyqqa ushyraǵan Kókshe jurtshylyǵy jalǵyz emes eken. Demegender de, jebegender de kóp. Pavlodar oblysynyń jastar resýrstyq ortalyǵynan eki «GAZelge» tıelgen gýmanıtarlyq júk keldi. Barlyǵy 5,8 mln teńge shamasyndaǵy zattar. Jambyl oblysynan tórt KamAZ-ǵa tıelgen kókónis pen jemis, qural-jabdyqtar eldiń ystyq yqylasy tárizdi bolyp jetti. Birden Atbasar qalasyna attandyryldy.
Qazirgi kúni Býrabaı baýraıyndaǵy «Baldáýren» saýyqtyrý ortalyǵynda sý basqan óńirlerden kelgen 100 bala alańsyz dem alyp jatyr. Qajetti kıim-keshekpen qamtamasyz etilgen. Eń bastysy – el birligi bekem. Yntymaq bar jerde qandaı qıyndyq bolsa da, eldiń jeńip shyǵaryna senim mol.
Aqmola oblysy