Qostanaıdaǵy «Sharq» tájik-ózbek etnomádenı birlestigi jıyrma jyl boıy otbasylyq úlgidegi «Januıa» balalar úıin qanatynyń astyna alyp, ata-ana qamqorlyǵynan qaǵylǵan balǵyndarǵa úzbeı qoldaý kórsetip keledi. Birlestiktiń jetekshisi Ergashvoı Holmetovke kádimgideı baýyr basyp qalǵan «Januıanyń» balalary da ol kisini kórgende «Ata keldi!» dep aldynan júgirip shyǵyp jamyraı qýanysyp qarsy alady.
«Januıa» balalar úıinde búginde 7 tárbıeshiniń qaraýynda 3 jas pen 18 jas aralyǵyndaǵy 45 bala turyp jatyr. Olardyń tórteýi kolledjde oqyp júr. Olardyń arasynda sport, óner salasynda jaqsy jetistikterge jetip, joǵary nátıjde kórsetip júrgen talantty jastar da bar.
«Ergashvoı Ermatovıch bastaǵan etnobirlestik ókilderi bizge jıi kelip, demeýshilik kómek kórsetip turady. Mysaly, ótken joly kóptegen azyq-túlik, jemis-jıdek, kókónister ákep berip ketti. Ol kisiniń bir kelgeni balalar úshin úlken mereke, bári qýanysyp, máz bolyp qalady. Táýelsizdik kúni qarsańynda da arnaıy kelip, balalarmen áńgimelesip, jaǵdaıymyzdy surap, tájik-ózbek ultynyń atynan sálem-saýqatyn berip ketti. Únemi janyna biraz adamdardy ertip kelip, osynda dastarqan jaıyp, shyǵys taǵamdarynyń merekesin jasap ketedi. Tashkentten kelgen hosh ıisti qaýyn-qarbyz, jemisterden de jyl saıyn bizdiń balalar birinshi bolyp dám tatady», deıdi balalar úıiniń basshysy Aınash Jaqanova.
«Sharq» sóziniń qazaqsha balamasy shyǵys degendi bildiredi. Atalǵan ulttyq ortalyq jylda qala ortalyǵynda uıymdastyryp turatyn dástúrli tájik-ózbek mádenıetiniń dýmandy kúnderi de shyraıly shyǵystyń bútindeı bir shaharyn kóshirip ákelgendeı óte áserli ótedi. Mundaıda mereke alańyna ózbek, tájik halyqtarynyń dámi til úıiretin dástúrli taǵamdarynan mol dastarqan jaıylyp, aınalany sazdy mýzyka men kerneı áýeni kernep ketedi. Qala turǵyndary kózdiń jaýyn alatyn neshe túrli qolóner buıymdaryn tamashalap, áıgili Qoja Nasyr men Baba Dıhandy qyzyq kórip, birge fotosýretke túsip shattanysyp jatady.
«Tájik-ózbek etnomádenı ortalyǵyna tóraǵalyq etken jıyrma bir jyldyń ishinde osy óńirde kóptegen ıgi jumysty atqardyq. 2006 jyldan beri qaraı Qazaqstan halqy Assambleıasynyń múshesimin. Bizdiń Dostyq úıinde 18 mádenı ortalyq bar. Bir-birimizben óte jaqsy, tatý turamyz. «Januıa» balalar úıin qamqorlyqqa alǵanymyzǵa bıyl 21 jyl bolady. «Jetim kórseń, jebeı júr» degen dana sóz bar emes pe, osy ıgi iske únemi ár jerdegi kásipkerlerdi demeýshilikke tartyp, balalarǵa qýanysh syılap otyrýdy dástúrge aınaldyrdyq. Bul iste bizge úlken qoldaý kórsetip jatqan Abýkahor Safarov, Fatoh Vosıev sııaqty jigitterimiz Tájikstanǵa jıi baryp turady. Ol jaqtan ulttyq qolóner týyndylaryn, ulttyq mýzyka aspaptaryn, odan ózge de qyzyqty jádigerler ala keledi. Osy óńirge belgili agroónerkásip salasynyń ókili, qazaqtyń uny men suıyq maıyn eksporttap jatqan «MelAgroprom» seriktestiginiń quryltaıshysy, iri kásipker baýyrymyz Talıb Sanaqulov, «Kostanaıskıe zorı» horeografııalyq ansambliniń bıshisi Tahır Shermetov syndy azamattar qaıyrymdylyq sharalaryna demeýshilik jasap, bizdiń bastamalarymyzdy únemi qoldap otyrady. Qazaq halqynda «Birlik bar jerde tirlik bar» deıdi ǵoı, bárimiz bir jaǵadan bas kóterip, qandaı mindet bolsa da birigip atqaryp jatyrmyz. Mysaly, eldi ábigerge salǵan sý tasqynyna da tájik-ózbek bolyp bas qosyp, Arqalyqqa on shaqty jigitti qol kómekke jiberdik. О́tkende Shymkentten eki júk kóligi gýmanıtarlyq kómek alyp kelip edi, búgin О́zbekstannan gýmanıtarlyq kómek jetti. Ony jańa ǵana Qostanaıdaǵy gýmanıtarlyq kómek taratý pýnktine túsirdik. Endi bárimizdiń maqsatymyz bir ǵoı. Birligimiz ajyramasyn, soǵys degen pále eshqashan tóbemizden tónbesin. Osy eldiń yntymaǵy ydyramasyn», deıdi Ergashvoı aǵa.
Jazdyń jaımashýaq kúnderiniń birinde «Sharq» ulttyq ortalyǵynyń uıymdastyrýymen ótetin ári qostanaılyqtar úshin dástúrge aınalyp ketken merekeniń biri – «Qaýyn-qarbyz kúni» festıvali. Festıval barysynda qaýyn-qarbyz kórmesi ashylyp, qaýyn-qarbyz jeýden jáne qarbyz dánin terýden kóńildi jarystar bastalady. Ergashvoı aǵanyń aıtýynsha, qaýyn-qarbyz kúni О́zbekstanda jyl saıyn atalyp ótip turady. Mundaı mereke aıasynda ótetin qyzyqty saıystarǵa eresektermen qatar, balabaqsha jasyndaǵy búldirshinder de qatysyp, túrli syılyqtar utyp alyp qýanysyp jatady.
«Jalpy, Ergashvoı Ermatovıch bizde burynnan jumys istep kele jatqan kisi ǵoı. Ol kisini osy Assambleıanyń aınalasyna toptasqan túrli ulttyq birlestikterdiń aqsaqaly desek te bolady. Osy óńirde ótip jatqan túrli mádenı-buqaralyq, qaıyrymdylyq is-sharalaryna jan sala atsalysyp, únemi shapqylap júredi. Oblystaǵy eki birdeı balalar úıine jıi baryp, jyl boıy qaıyrymdylyq is-sharalaryn ótkizip turady. Munyń syrtynda, sý tasqyny kezinde Ergashvoı aǵamyzdyń arqasynda elimizdiń ońtústik óńirlerinen kóptegen gýmanıtarlyq kómek qabyldap alyp, halyqqa taratyp berdik», deıdi Dostyq úıiniń basshysy Natalıa Ramazanova.
Qostanaı oblysy