Búginde qazaqtyń baǵyna buıyrǵan ulanǵaıyr atyrapta túrli etnos ókilderi de birlik týyn bıik kóterip keledi. Qıly zaman qıyndyǵyn eńserip, osy topyraqqa taban tiregender jergilikti jurttyń jaısań minezin erekshe eksheıdi. Qıyrdan qazaq dalasyna tarıhı sebeppen turaqtaǵandardyń ortaǵa sińisip ketýine de ultymyzǵa bitken uly qasıet sep bolǵan.
Ulttyq statıstıka bıýrosynyń dereginshe, elimizde orys (15,1%) etnosynan keıin kóp qonystanǵandar – ózbekter (3,2%). Ár etnos ókilderiniń arasynda ultymyzdyń ulttyq qundylyqtaryna asa qyzyǵýshylyqpen qarap, qurmet tutatyndar orasan. Bizdiń búgingi keıipkerimiz DılnozaTadjımetova da osy qatarda. Túrkistan oblysy, Saýran aýdanynyń turǵyny búldirshin kezinen qazaqtyń dástúr-joralǵysyn jetik bilýge yntyq bolǵan. Qazaq halyqynyń qundylyqtaryna qumartyp ósken burymdy dombyra shertýdi 15 kúnde úırenip alǵan.
«Jumabek Tashenov atyndaǵy mektebimizde aqyly dombyra úıirmesine baryp júrgenime sáýir aıynda bir jyl toldy. Dombyrany qolǵa alýyma ustazym Uljalǵas Ábildahan áser etti. Ustaz alǵash ret dombyrasyn ustap kirip kelgende keremet áserge bólendim. Apaıymnyń sol kezdegi beınesi tarıhtaǵy ónerli tulǵalardy kóz aldyma keltirdi. Kózdiń jaýyn alatyn búrmeli kóılek, oıýmen órnektelip, monshaqtarmen ádiptelgen qazaqtyń ulttyq kıiminde, ulttyq aspap dombyramen dástúrli ándi shyrqaı bilgenim, bir jyl buryn osynyń bárin úırenýge bel baılaǵanym men úshin mańyzdy mártebe», deıdi Dılnoza Zarıfqyzy.
(Dılnoza Tadjımetova ustazy Uljalǵas Ábildahanmen)
Dılnoza dombyra úıirmesine úıir bolǵan bir jylda alty dástúrli qazaq ánin úırenip alǵan. Ol qazaqtyń sazy, áni keń dalasyndaı, darhan kóńilindeı tereń ekenin tolǵaıdy.
«Dombyra qundy, kıeli - aspap. Úkili dombyra úıge sán berip qana qoımaı, bereke kirgizedi», dep sıpattaǵanda súısinip qaldyq.
Keıipkerimiz túrli dástúrli án baıqaýlarynda baq synap, sheberligin shyńdap júr. О́tken jyly Mádenıet jáne aqparat mınıstrligi uıytqy bolǵan «Myń bala» jobasynda Dılnoza barlyq kezeńdi artqa qaldyryp, respýblıkalyq márede de birinshi boldy. Osy saıysta «Súgirdiń termesin» shyrqaǵan Dılnoza kópshiliktiń de kóńilinen shyqty.
- «Myń bala» jobasynyń qorytyndy satysynda vokal, dombyra, qobyzdaǵy oryndaýshylar «О́nerli órge júzer» atalymynda synǵa tústik. 35 óńirlik jeńimpazdar marapattaldy. Bas qalada ótken osy tartysty básekeden keıin men joǵary oqýdy mýzyka baǵytynda jalǵastyramyn dep sheshtim. Bolashaqta dástúrli án úıretetin ustaz bolǵym keledi. Ásem qala bizdi shabyttandyrdy», dedi DılnozaTadjımetova.
Sondaı-aq Dılnozany ustazdary aıtys ónerine de baýlyp júr eken. Qazaqty óner arqyly súıgen ol sýyryp salyp aıtýdy tereń meńgergen halyqtyń ortasynda otyryp, ony meńgermeı, ýaqytty bos ótkizýge bolmaıtynyn aıtty.