Senat Spıkeri Máýlen Áshimbaevtyń tóraǵalyǵymen ótken Palata otyrysy barysynda senatorlar depýtattardyń bastamasymen ázirlengen «QR-nyń keıbir zańnamalyq aktilerine baılanys, sıfrlandyrý, ınvestısııalyq ahýaldy jaqsartý jáne artyq zańnamalyq reglamentteýdi bolǵyzbaý máseleleri boıynsha ózgerister men tolyqtyrýlar engizý týraly» zańdy eki oqylymda qarap, maquldady, dep habarlaıdy Egemen.kz Senattyń baspasóz qyzmetine silteme jasap.
Zań operatorlardyń baılanys ınfraqurylymyna, onyń ishinde ákimshilik ǵımarattarǵa, talshyqty-optıkalyq baılanys jelilerin jáne uıaly baılanys quraldaryn ornalastyrýǵa arnalǵan óndiristik nysandarǵa birdeı qoljetimdiligin qamtamasyz etedi. Jer kodeksine engizilgen ózgeristerge sáıkes, jeliler men kommýnıkasııalyq nysandardy salý úshin qoǵamdyq servıtýttar belgilenedi. Mundaı qadam magıstraldar boıyndaǵy baılanys qyzmetterin sapaly kórsetýdi qamtamasyz etedi jáne baılanys operatorlaryna ınfraqurylymdyq shyǵyndardy azaıtýǵa, sondaı-aq, olardy salany damytýǵa qaıta ınvestısııalaýǵa múmkindik beredi.
Nesıelik bıýro arqyly banktik nesıe nemese mıkronesıe alýdan erikti túrde bas tartýdy belgileý nemese joıý múmkindigi – zańda qarastyrylǵan taǵy bir mańyzdy ózgeris ekenin atap ótken jón.
«Aqparattyq tehnologııa zamanynda sapaly sıfrlyq qyzmetter barlyq azamattarǵa birdeı qoljetimdi bolýǵa tıis. Memleket basshysy bul máselege únemi basa mán berip keledi. Osyǵan baılanysty Parlament depýtattary búgin qaralǵan aýqymdy túzetýler toptamasyn ázirledi. Bul zań baılanys naryǵyn, sondaı-aq, sıfrlandyrýdy damytý jáne aqparattandyrý salasyna ınvestısııa tartý máselelerin qamtıdy. Birqatar túzetý ǵaryshtyq monıtorıng derekterin paıdalaný aıasyn keńeıtýge arnalǵan. Sonymen qatar alaıaqtyq belgileri bar tólem tranzaksııalaryn bolǵyzbaýǵa baǵyttalǵan naqty sharalar qarastyryldy. Jalpy, maquldanǵan zań sapaly ári qoljetimdi baılanys qyzmetterin usynýǵa jáne Qazaqstannyń sıfrlyq áleýetin damytýǵa óz úlesin qosady dep senemiz», dedi Máýlen Áshimbaev.