Tabıǵaty tamasha taý bókterine jaqyn ornalasqan, aýmaǵy 7 gektar bolatyn «Aq bulaq» ońaltý ortalyǵynda balalarǵa jasalǵan jaǵdaı, tyń ádister búginde ózge mekemelerge úlgi etilip keledi. Ortalyq jumysyn jetildire túsý úshin qyzmetkerleri Ramazan aıynda pitir sadaqalaryn arnaıy qorǵa jınap, sol qarajatty jaqsy bastamany júzege asyrýǵa jumsaǵan.
Deneshynyqtyrý kabıneti, án jáne oıyn terapııalyq bólmeleri zamanaýı úlgide jasaqtalyp, arnaıy mektep kabınetteri ulttyq naqyshta bezendirilgen. Bir bólme aspan ǵalamsharlarymen kórkemdelip, teleskop apparaty qoıylǵan, ıaǵnı balalardyń qııalyna erik beretin múmkindik jasalǵan. Oblystyq balalardy ońaltý ortalyǵy 3 jastan bastap kámeletke tolmaǵan múmkindigi shekteýli balalarǵa medısınalyq kómegin usynady. Mundaǵy 175 tósek-orynnyń 85-i nevrologııalyq, 90-y ortopedııalyq syrqattarǵa arnalǵan. Byltyr munda 2 800 bala ońaltý em-sharalaryn qabyldaǵan. Ortalyqta 177 adam turaqty jumys isteıdi.
«Biz sadaqany saýapty iske jumsap, ortalyq qyzmetin jaqsarta túsý maqsatyndaǵy bastamany birazdan beri oılap júrgenbiz. Em alýǵa kelgen balalardy barynsha qyzyqtyryp, ómir súrýge qulshynysyn arttyrýdy qaladyq. Túrli kabınetter ashyp, balanyń zeıinin kóterýge múmkindik syıladyq dep oılaımyn. Bizdiń ortalyqqa kelgen balalar 18 kún ishinde bilim alyp, jan-jaqty damıdy degen senimdemin. Osy bastamamdy qoldap, qolushyn sozǵan kásipkerlerge, ujymdaǵy barlyq qyzmetkerge sheksiz rızashylyǵymdy bildiremin. Syrttan adam shaqyrmaı, barlyq isti jumyla atqardyq. Oıymdaǵydan da keremet dúnıeler shyqty», deıdi ońaltý ortalyǵynyń basshysy Nurhan Narymbetova.
Ortalyqta balalardyń medısınalyq em-sharalarmen qosa úzdiksiz bilim alýyn qamtamasyz etý maqsatynda bastaýysh, negizgi jáne jalpy orta bilim berý kóleminde matematıka, qazaq tili men ádebıeti, orys tili, Qazaqstan jáne dúnıe júzi tarıhy, jaratylystaný, geografııa pánderi bazalyq tártipte oqytylady. Matematıka páni Qalan.kz ınteraktıvti onlaın portaly arqyly ótkiziledi. Erekshe balalardyń matematıkalyq saýatyn arttyrý mańyzdy ekenin eskerip, atalǵan portaldy bir jyl tegin paıdalaný múmkindigin syılaǵan Qalan.kz-tiń negizin qalaýshy Asqar Bolatqa ortalyq qyzmetkerleri dán rıza. Isker basshy Nurhan Mádáliqyzynyń osyndaı balalar úshin jasaǵan ıgilikti de saýapty isi áriptesterine úlgi bolyp otyr.
«Ujymdaǵy meıirgerler, kishi qyzmetkerler birigip, biri qabyrǵaǵa sýret salyp, biri oıý oıyp, tusqaǵaz jabystyryp, biri arnaıy apparat satyp alyp berip, biri qoldanystan tys qalǵan arbasyn ákelip úlken uıymshyldyq tanytqan. Arnaıy bólme yńǵaılastyryp, telefonǵa telmirgen balalarǵa paıdaly dúnıeni úıretýdiń ózi – úlken qýanysh. Aýyz toltyryp aıtýǵa bolarlyq bul bastama jalǵasyn tabady dep oılaımyn», deıdi Densaýlyq saqtaý basqarmasynyń oblys boıynsha shtattan tys balalar reabılıtologi Marııam Parmanova.
Aıta ketelik, Túrkistan oblysynda múgedektigi bar 11 myńǵa jýyq bala esepte turady. Sonyń 30 paıyzy – júıke júıesi aýrýlaryna shaldyqqan erekshe balalar. Olarǵa óńirde 4 ońaltý, 3 qamqorlyq ortalyǵy qyzmet kórsetedi.
Túrkistan oblysy