Agrarly óńir aýyl sharýashylyǵy salasyndaǵy ónimderdi kóbeıtýge bel baılap otyr. Osy baǵytta sút ónimderine suranys artyp keledi. Oǵan dálel – Taldyqorǵandaǵy «JLC Sút» zaýyty. Kásiporyn búginde 80 tonna sút óńdep, 60-qa tarta ónim shyǵarady.
Tutynýshylar kóbeıgen saıyn, zaýyt ta soǵan saı ónimderin túrlendirip otyr. Máselen, buǵan deıin sút, sary maı, qurt, irimshik, túrli ashytylǵan sút ónimderi shyǵarylyp kelse, endi soǵan qosymsha glazýrli irimshik súzbelerin óndirýdi qolǵa alǵan. О́ńir ákiminiń baspasóz qyzmetiniń málimetinshe, kásip ıesi jańa jelini iske qosý úshin Majarstannan tapsyryspen daıyndalǵan quny shamamen 150 mln teńge bolatyn arnaıy jabdyq satyp alǵan. Qazir sonyń ıgiligin kórip otyr.
Jalpy, zaýyt mamandary «JLC» kompanııalar tobynyń sút óńdeý kásiporyndarynda oqytyp-úıretýden ótken eken. Kásiporyn qazir súzbeniń 5 túrin shyǵarady. Mysaly, jańa glazýrli irimshik súzbesin aıyna 16 tonna óndiredi. Sebebi halyqtyń buǵan suranysy joǵary. Sondyqtan mamandar barynsha talapqa saı jumys isteýge tyrysady.
«JLC Sút» JShS zaýytynda aıyna 2 myń tonnadan astam daıyn sút ónimi óndiriledi. Oǵan qajetti shıkizat óńirdegi sharýashylyqtardan satyp alynady. Daıyn ónim Taldyqorǵan men Almaty qalalarynda jáne jalpy Jetisý oblysy aýmaǵynda satylady. Oblys ortalyǵynda zaýyttyń 21 fırmalyq dúkeni bar. Kásiporyn 260-tan astam turaqty jumys ornyn ashqan, onyń 110-i sút óndirisine tartylǵan.
«2014 jyly Taldyqorǵan sút zaýytynyń bazasynda qurylys jáne jańǵyrtý jumystary júrgizildi. Sonyń nátıjesinde kásiporyn zamanaýı jabdyqtarmen tolyq jaraqtaldy. Osynyń arqasynda bizdiń ónimderimizdiń túri jyl saıyn kóbeıip keledi. Biz sút óndirisiniń dástúrli jáne zamanaýı úrdisterin úılestire otyryp, tutynýshylarymyzdyń qajettiligin qanaǵattandyrýǵa tyrysamyz. Mysaly, bizdiń kásiporynda ejelden kele jatqan sary maı men qurt jasaýdyń tehnologııasy men resepti saqtalǵan. Jaqynda zaýytta jańa ónim – glazýrli súzbe shyǵara bastadyq. Jańa jelini iske qosýǵa qajetti zamanaýı jabdyqtar satyp aldyq», deıdi óndiris meńgerýshisi Ámına Arynbekova.
Ol kásiporynda 10 jylǵa jýyq qyzmet etip keledi. Zerthanashydan sút óndirisiniń basshysyna deıin kóterilgen mamannyń aıtýynsha, tutynýshylardyń ónimdi jaqsy qabyldanǵanyna kóz jetkizgen soń bıyldan bastap kokos, qulpynaı qosylǵan taǵy 2 túrin qosqan.
«Jabdyqtar shyǵarǵan zaýyttyń mamandary iske qosý-baptaý jumystaryn júrgizdi. Biz osy qural-jabdyqtarmen qalaı jumys isteý kerektigin úırendik. Osylaısha, ótken jyldyń shildesinen bastap súzbe óndirýdi qolǵa aldyq. Naryqtaǵy suranysty zertteı otyryp, irimshiktiń úsh túrin: shokolad, qoıýlatylǵan sút pen vanıl shyǵarýdy bastadyq», deıdi Á.Arynbekova.
Zaýyt basshylyǵynyń aıtýynsha, súzbe irimshikteri kásiporynda óndiriletin jańa ónim bolýyna baılanysty olar qazir ózindik qunyna satylýda, máselen zaýyttyń fırmalyq dúkenderinde 1 danasy 150 teńge turady. Ázirge qoıýlatylǵan sút pen vanıl qosylǵan irimshikterge degen suranys joǵary.
Kásiporyn aldaǵy ýaqytta sary maı óndiretin jeke seh ashýdy josparlap otyr. Atap ótsek, ótken jyly «JLC Sút» zaýyty 115 tonna sary maı óndirdi, al qazir aıyna shamamen 15-20 tonna óndirilýde.
Oblystyq aýyl sharýashylyǵy basqarmasynyń málimetinshe, búginde Jetisýda 8 280 basqa arnalǵan 36 taýarly sút fermasy bar. Sáýir aıynyń basynda MTF-da 8 600 tonnaǵa jýyq sút óndirilgen. Jalpy, osy jyly óńirde mal basy taǵy 2,5 paıyzǵa ósedi dep kútilýde. Demek aldaǵy ýaqytta 10 myń tonnadan astam sút óńdeýge múmkindik týmaq.
Jetisý oblysy