Keıingi jyldar muǵdarynda jasampaz jastardan quralǵan mádenı uıymdardyń sany kúnnen-kúnge artyp keledi. Olar qoǵamdaǵy túıtkildi óner rýhymen sheshkisi keletinin baıqap-aq júrmiz. Ashy sııa, ýly tilmen zamannyń zapyran qaıǵysyn, adamnyń minezindegi dert-merezderdi qaımyqpaı ashyq aıtady. Oǵan bek qýanyshtymyz. Alaıda bizdi shoshytatyn dúnıe – olardyń únindegi úmitsizdik.
Jaqynda shetel kórgen, oqyǵan azamattyń bireýimen áńgimelesip qaldyq. Damyǵan elderdegi órkenıet úlgisin aıta bastady. Ol jaqtaǵy azamattardyń mádenıettiligi, áleýmettik júıeniń keremet qurylǵandyǵy jóninde biraz sóıledi. Aqyry bizdiń elge keldi. «Qazaqstanda she?» degen sózinen Otanǵa degen jıirkenish ıisi múńk ete qaldy. Týǵan jeri týraly baıanynda tyjyrynǵan beti bir jazylmady. Oqyǵan, zııaly adam dersiń. Biraq kózinen halqyna degen bir tamshy mahabbat baıqalmady.
Destrýktıvti aǵymdarǵa ilesken aǵaıyndarda da osy psıhologııa anyq kórinedi. Ǵasyrlar súzgisinen ótken salt-sana, ádet-ǵuryp, ádep-ahlaqtyń barlyǵy olarǵa jat kórinedi. Ult birligi, memleket tutastyǵy sekildi qaǵbadaı qasterli uǵymdar janyn asa mazalamaıdy. Alber Kamıýdiń «Bógde» adamy sekildi beınebir. Asylynda, bulbul baǵynan, qulan qaǵynan jerimese kerek edi ǵoı.
Joǵarydaǵy oıymyzdy qaıta qaýzaıyq. Zamanynda qalamdas aǵasy Júsipbek Aımaýytulynyń kúıreýik, qaıǵyshyl dep synaǵan Maǵjan Jumabaevtyń ózi «Súıemin» degen óleńinde úmittiń altyn araıyna kóńilin qyzdyrady:
«Uıqy basqan qabaǵyn,
Bastyra kıgen tymaǵyn.
Jalqaýlyqty jar kórgen.
Júrgen eski zańymen,
Aldyndaǵy malymen,
Birge jýsap, birge órgen.
Alash degen elim bar,
Nege ekenin bilmeımin –
Sol elimdi súıemin!»,
– deıdi-aý ult uzany. Shartsyz, esepsiz súıý degenińizdiń has úlgisi. Al halyq batyry Baýyrjan Momyshuly «О́z ultyn syılamaý, ony maqtanysh etpeý – satqyndyq», depti...