Senattyń Halyqaralyq qatynastar, qorǵanys jáne qaýipsizdik komıtetiniń depýtattary Taıland Parlamenti Senatynyń Qarýly kúshter jáne memlekettik qaýipsizdik komıtetimen kezdesý ótkizdi.
Komıtet tóraǵasy Andreı Lýkın kezdesý barysynda Qazaqstan men Taıland arasynda senimdi saıası dıalog ornaǵanyn, berik saýda-ekonomıkalyq jáne mádenı baılanystar qalyptasqanyn atap ótti.
«Biz eki eldiń zań shyǵarýshy organdary deńgeıinde ózara is-qımyldyń joǵary qarqynyn saqtaýǵa tıispiz. Parlamentaralyq yntymaqtastyq ekijaqty qarym-qatynastyń ajyramas bóligi bolyp tabylady jáne biz taı áriptesterimizben zańnamalyq tájirıbe almasýǵa múddelimiz. Biz sondaı-aq Azııadaǵy ózara is-qımyl jáne senim sharalary jónindegi keńes jáne Azııadaǵy yntymaqtastyq jónindegi dıalog sııaqty óńirlik alańdar aıasyndaǵy yntymaqtastyqqa basa nazar aýdaryp otyrmyz», dedi Andreı Lýkın.
Qatysýshylar sonymen qatar Álemdik jáne dástúrli dinder lıderleri seziniń rólin de talqylady. Bul alań 2003 jyldan bastap qazirgi álemniń ótkir máselelerin sheshýde barlyq eldiń rýhanı kóshbasshylarynyń kúsh-jigerin biriktirý men dinaralyq dıalogtiń tanylǵan tuǵyrnamasyna aınalǵany atap ótildi. Andreı Lýkın Álemdik jáne dástúrli dinder lıderleri seziniń jumysyna Taıland ókilderiniń belsendi qatysqany úshin áriptesterine alǵysyn bildirdi.
Taıland Parlamenti Senatynyń Qarýly kúshter jáne memlekettik qaýipsizdik komıtetiniń tóraǵasy Býnsrang Nıýmpradıt óz kezeginde Qazaqstanda júrgizilgen saıası reformalardyń joǵary deńgeıine toqtaldy jáne parlamentaralyq yntymaqtastyqty odan ári damytýdyń mańyzdylyǵyn atap ótti.