2015 jyly 1 qańtarda Aqtóbe oblysynda 176 maıdanger tursa, bıylǵy Jeńis kúnin jalǵyz ardager ǵana qarsy almaqshy. Soǵystyń sońǵy sarbazy Vasılıı Greskıı Jeńis kúni 2 mıllıon 500 myń teńge syılyq alady.
Hromtaý qalasynda turatyn 100 jastaǵy maıdanger V.Greskıı Belorýssııanyń Vıtebsk oblysy Polosk qalasynda kópbalaly otbasynda dúnıege kelgen. Ákesi erte qaıtys bolǵanda, anasy shıetteı jeti balamen Jambyl oblysynyń Moıynqum aýdanyna qonys aýdarǵan. Moıynqum mektebinde oqýyn aıaqtap, maqta egistiginde jumys istep júrgeninde soǵys bastalady.
1942 jyldyń qańtarynda Almaty qalalyq áskerı komıssarıatyna shaqyrtylyp, alty aı áskerı daıyndyqtan ótken soń aldyńǵy shepke attanady. I Ýkraına jáne III Belarýs maıdandarynda 8-kavalerııalyq dıvızııa quramynda shaıqasyp, Polsha, Chehııany azat etýge qatysyp, 1945 jyly Jeńisti Berlın túbindegi Elsıh qalasyndaǵy áskerı gospıtalda qarsy aldy. «Qyzyl Juldyz» jáne II dárejeli «Otan soǵysy» ordenderimen marapattalyp, elge oralǵan soń beıbit eńbekke aralasty. Áıeli ekeýi úsh bala tárbıelep ósirdi. Qazir ǵasyr jasaǵan ardager alty nemere men on shóbereniń atasy.
Muraǵattaǵy qujattarǵa súıensek, 1941 jyly 1 qańtarda Aqtóbe oblysynda 335 myń 900 adam turǵan. Soǵysqa 122 423 aqtóbelik shaqyrtý alǵan. 36 192 jaýynger maıdanda qaza tapsa, 86 231-i elge aman oraldy, 17 368 sarbaz iz-túzsiz joǵalyp ketti. Alaıda soǵysta iz-túzsiz ketkenderdiń deregi naqty emes.
Birer kún buryn aqtóbelik «Álııa» izdeý jasaǵy 1942 jyly Aqtóbede qurylǵan 74-derbes teńiz atqyshtar brıgadasy jaýyngerleri soǵysqan Parfın aýdanynda qazba jumystaryn júrgizýge Reseı Federasııasy Novgorod oblysyna attandy. Osy kezge deıin 1941 jyldyń tamyzynda soǵysqa jiberilgen Aqtóbeden jasaqtalǵan 312-atqyshtar brıgadasynyń 5 myń jaýyngeriniń derekterin túgendeý jumystary qolǵa alyndy. Sondaı-aq 1942 jyldyń kúzinde bastalǵan «Mars» operasııasyna qatysqan, Tver oblysynyń Olenın aýdanynda shaıqasqan 101-ulttyq derbes atqyshtar brıgadasy jaýyngerlerin izdestirý jumystary júrgizildi.
Aqtóbe oblysy