Otandyq kınogerler qazaqtyń batyr qyzy Álııa Moldaǵulova týraly kórkem fılm túsirýdi qolǵa aldy. Atalǵan týyndy Álııa Moldaǵulovanyń 100 jyldyǵyna, Jeńistiń 80 jyldyǵyna oraı 2025 jyldyń mamyr aıynda jaryqqa shyǵady dep josparlanǵan.
Maıdan dalasynda eren erlik kórsetken qaısar qyzdyń ómir joly týraly derekti fılmder toptamasy buǵan deıin túsirilgenimen, tolyqmetrajdy kórkem fılm alǵash ret kórermenge jol tartpaq. Jobanyń rejısseri elimizge tanymal jas rejısser – Alen Nııazbekov. Al fılmniń ssenarııin máskeýlik jýrnalıst Alena Kýleshova úsh jyl kóleminde jazyp shyqqan.
– Qazaqtyń batyr qyzy Álııa Moldaǵulova maıdanǵa attanǵanda jasóspirim boldy. Qolyna qarý alyp, mergendik tanytqan ol 78 jaý áskeriniń kózin joıyp, Keńes Odaǵynyń Batyry ataǵyn aldy. Bul oqıǵa máskeýlik jýrnalıst Alena Kýleshovany baýrap alǵany sonshalyq, ol ómiriniń úsh jylyn ssenarıı jazýǵa arnady. Mıfter men ańyzdardan bas tartyp, ómirdiń shynaıy shyndyǵyn izdedi. Álııany jaqsy biletin adamdardy taýyp, olarmen tildesti, – deıdi fılmniń bas prodıýseri Aleksandr Shýhov.
Kınogerler jumys barysynda ǵylymı qaýymdastyq pen tarıhshylardyń da pikiri eskeriletinin, «Álııa» fılmi soǵys týraly emes, batyldyq pen qaısarlyqty boıǵa sińirgen qazaq qyzynyń bolmysyna arnalatynyn atap ótti.
Almatyda jýrnalıstermen júzdesken shyǵarmashylyq top ókilderi jobaǵa 900 mln teńgeden astam qarajat jumsalady dep josparlanǵanyn, túsirilim jumystary el aýmaǵynan bólek, Belarýs elinde ótýi múmkin ekenin jetkizdi.
«Biz tek senimdi, sarapshylar rastaıtyn jáne moıyndaıtyn faktilerdi qoldanýdy maqsat ettik, Máskeý áskerı muraǵattaryndaǵy jumys nátıjesinde dramalyq materıal úshin dáleldengen negiz jınaldy. Týyndyda Álııanyń ósken ortasy, ata-anasy, týǵan jeri týraly baıandalady. Atalǵan joba óskeleń urpaqty otanshyldyqqa, adaldyqqa baýlıtyn dúnıe bolady degen úmitimiz mol. 9 mamyrdan bastap jalpyulttyq kastıng ótedi. Basty róldi somdaıtyn aktrısany Qazaqstan turǵyndary arasynan izdestiremiz. Álııanyń obrazyn ashatyn 15-16 jastaǵy, boıy 150-155 sm bolatyn qazaq qyzyna keń aýqymdy ashyq kastıng jarııalaımyz», deıdi rejısser Alen Nııazbekov.
ALMATY