Eptilik pen dáldikke, shıraqtyqqa tárbıeleıtin ulttyq oıyndarymyzdyń biri – asyq atý. Atadan balaǵa jalǵasqan ulttyq sporttyń bul túri búginde Almaty oblysynda keń etek alyp, balalardyń asyq atýdaǵy sheberlikteri shyńdalyp keledi. Ony jýyrda asyq atý men bes asyqtan ótken oblystyq chempıonat anyq ańǵartty.
«Oblystyq chempıonattyń negizgi maqsaty – óskeleń urpaqqa asyq oınaýdy jetik meńgertip, jasóspirimderdiń qyzyǵýshylyǵyn arttyrý. Jeńimpazdar respýblıkalyq chempıonatqa joldama alyp, el myqtylarymen baq synasady. Bul jarysqa qyzdarymyz da qatysyp, bes asyqtan básekege tústi. Buryn ata-babamyz «bes tas» oınaǵan, sony «bes asyq» dep ózgerttik. Jalpy, asyq pen bes asyq oınaýdyń bala densaýlyǵyna tıgizer paıdasy orasan zor. Eń bastysy, smartfonǵa táýeldililikten arylyp, qımyl-qozǵalysyn arttyrady», deıdi Almaty oblysynyń asyq atý federasııasynyń atqarýshy dırektory Erkin Raqymbaev.
Byltyr jeltoqsan aıynda qurylǵan oblystyq asyq atý federasııasy uıymdastyrǵan bul saıysqa Qonaev qalasy men Jambyl, Talǵar, Qarasaı, Eńbekshiqazaq aýdandarynan komandalar qatysyp, básekeli jarystyń bel ortasynan tabylǵan. Al asyq oınaýda qara jerdiń shańyn shyǵaratyn naǵyz sheberler shyǵaryna shek keltirmeıtin Raıymbek, Kegen, Balqash aýdandary shet qalyp otyr. Oǵan shtattyń bólinbeýi qolbaılaý kórinedi.
Sonymen asyq atýdan komandalyq jarysta 1-oryndy Ulttyq sport, 2-oryndy Jambyl aýdanynyń «Jasulan» uıymy, al 3 jáne 4-oryndy Qarasaı aýdany men Qonaev qalasynyń oıynshylary ıelendi.
Jekeleı jarysta Nuralı Oralbaı, Jasulan Jánibekov, Erdáýlet Esenkeldi mergendik tanytyp, aldyna qara salmady.
Bes asyq jarysyna qatysqan qyzdar da oıyn kórigin qyzdyrdy. 2014-2016 jylǵy kishi jasóspirimder arasyndaǵy básekede 1-oryndy Qarasaı aýdanynyń komandasy, 2 jáne 3-oryndardy Talǵar men Jambyl aýdanynyń oıynshylary utyp aldy.
Jekelegen jarysta Talshyn Aslanbekqyzy, Balaýsa Myqtybek, Janerke Sovethan syndy sheberler chempıonatta tamasha oıyn úlgisin kórsetip, tuǵyrǵa kóterildi.
Almaty oblysy