Petropavlda «Qazaqstan barysy» týrnırine qatysatyn jeńimpaz anyqtaldy. Ol ótken senbi kúni A.Vınokýrov atyndaǵy sport saraıynda qazaq kúresinen «Qyzyljar barysy-2024» atty oblystyq týrnırde belgili boldy.
О́ńirimizdiń eń myqty balýany ataǵyn jeńip alý jáne «Qazaqstan barysy» respýblıkalyq týrnırinde Soltústik Qazaqstan oblysynyń namysyn qorǵaýǵa qatysý úshin 32 úzdik sportshy saıysqa tústi. Keń saraıdyń kórermender orny da lyqa tolǵan. Jurttyń bárine alyptardyń aıqasy qyzyq kórinedi.
Soltústik Qazaqstan oblysy dene shynyqtyrý jáne sport basqarmasy baspasóz qyzmetiniń málimetine qaraǵanda, «Qazaqstan barysy» respýblıkalyq týrnıriniń óńirlik kezeńine barlyq aýdan belsendi qatysyp, óz balýandaryn shyǵarǵan. Bul jarysta salmaǵy 95 kılodan joǵary túıe balýandar kúresetini belgili. Alyp tulǵaly jigitter oblystyń 13 aýdany men Petropavl qalasynan iriktelip kelipti. Kórermenderdi rıza qylyp qazaqsha ishten, syrttan shalyp túsirýdiń ádisterin jetik meńgergender shý degennen alǵa tústi.
Fınalda Qyzyljar aýdanynyń jas balýany Ádilet Myrzash pen Ýálıhanov aýdanynyń týmasy, týrnırdiń birneshe dúrkin jeńimpazy Altynbek Aýsaǵıtov kezdesti. Bul jerde jastyń kúshi men tis qaqqan balýannyń tájirıbesi synǵa túskendeı boldy. Qyzyljar aýdanynyń balýany «Qyzyljar barysy» týrnırine alǵash ret qatysyp otyr. Onyń jasy nebári – 18-de ǵana. Qara kúshi kóp bolǵanymen ádis-aılasy jetispeı jatqany kórinip tur. Al Ýálıhanov aýdanynyń ókili bul jarysqa birneshe ret qatysqan, ári tájirıbeli, ári kúres ádisterin jetik meńgergen sheber. Kórermenniń ishin tartqyzyp qyzyqtyrǵan kúreste ozyq tájirıbe ozyp, Altynbek Aýsaǵıtov bul joly da jeńiske jetti. Endi ol respýblıkalyq «Qazaqstan barysy» týrnırinde Qyzyljar óńiriniń namysyn qorǵaıtyn boldy.
Sóıtip, bas báıgege tigilgen 500 myń teńgeni Altynbek Aýsaǵıtov enshiledi. Al jas balýan Ádilet Myrzash 300 myń teńgeniń báıgesin alsa, qola júldeger Shal aqyn aýdanynyń balýany Batyrhan Qaıyrbekke 200 myń teńgeniń sertıfıkaty buıyrdy.
Soltústik Qazaqstan oblysy