Qostanaı oblystyq tarıhı-ólketaný mýzeıinde turǵan keseqapty 1963 jyly Qostanaı qalasynyń turǵyny Hákimbek Qojabekov degen kisi tapsyrypty. Kóneniń kózindeı bolǵan qundy jádiger murajaıdyń túsim kitabyna «dárkez» degen ataýmen tirkelgen. Hákimbek qarııa «101 jas ómir súrgen ájemnen qalǵan kóz edi» degen jazba qaldyrypty. Mýzeı qyzmetkerleriniń aıtýynsha, kóne jádiger shamamen HIH ǵasyrdyń orta sheninde jasalǵan.
«Terkesh – forfordan jasalǵan keselerdi salatyn teriden jasalǵan ishi jumsaq, tysy qatty turmystyq buıym. Ejelde ata-babalarymyz kóship-qonǵan kezde ydys-aıaǵy synyp qalmaýy úshin paıdalanǵan. Onyń kese tárizdi qýys qaltashyǵy bolady, tómengi bóligi – tegis. Terkeshtiń syrtqy pishini jarty shar tárizdi dóńgelenip keledi, tóbesinde qaıys shashaǵy – qarqarasy jáne kóshkende attyń qanjyǵasyna baılaýǵa yńǵaıly jalpaq baýy bar. Qaltashyq beti men qaqpaǵyn bir-birimen bettestirip baılaýǵa arnalǵan 5 qulaqsha qaıys baýy bolady. Bes qıyqtan piship, qurap tikken. Tysy órnekpen jáne metall jiptermen zerlenip, úshburysh tumarsha oıýy salynǵan. Ydys synyp qalmaýy úshin ishki jaǵy kıizben qaptalǵan. Negizi mundaı turmystyq dúnıelerdi jasaýǵa kóbine ystyqqa, sýǵa tózimdi túıeniń terisi paıdalanylǵan», deıdi mýzeıdiń ǵylymı hatshysy Názıma Otasheva.
Áıet aýylyndaǵy Beıimbet Maılın atyndaǵy tarıhı-ólketaný mýzeıinde de úsh uıashyqty terkesh saqtaýly tur.
Qostanaı oblysy