Jetisý avtojoldarynyń jalpy uzyndyǵy 3 988 shaqyrymdy qurasa, onyń 2 732,1 shaqyrymy oblystyq mańyzy bar avtojol sanatynda. Byltyr bul salaǵa 9,2 mlrd teńge qarajat bólinip, ıgerilgen edi. Nátıjesinde, oblystyq mańyzy bar avtojoldardyń jaqsy jáne qanaǵattanarlyq jaǵdaıdaǵy úlesi 93 paıyzǵa jetti. Bıyl atalǵan salaǵa 20 mlrd teńge qarajat bólingen. Demek aımaqtaǵy jol sapasy jaqsara túsedi degen sóz.
Memleket basshysy 2022 jyly oblysqa kelgen saparynda oblys ákimine úsh jyl ishinde apatty 15 kópirge kúrdeli jóndeý jumysyn júrgizýdi, sonymen qatar Balqash kóline deıingi avtomobıl joldaryn jóndeý jumysyn aıaqtaýdy tapsyrǵan edi.
«Byltyr oblystyq mańyzy bar avtojoldardyń boıyna ornalasqan 5 kópirge kúrdeli jóndeý jumysy bastalyp, 2 kópir paıdalanýǵa berilse, 3-eýi bıyl qoldanysqa beriledi. 10 kópirdiń qujatyna qaıta túzetýler engizý boıynsha jumys júrgizilip jatyr», deıdi oblystyq jolaýshy kóligi jáne avtomobıl joldary basqarmasynyń basshysy Ǵalymjan Dáribaev.
Sol saparynda Memleket basshysy oblystyń týrıstik klasterin damytý maqsatynda iske asyrylatyn Balqash kóliniń jaǵasyna aparatyn 137 shaqyrym avtojoldy qaıta jańartý jumysyna da nazar aýdarǵan. «Almaty – О́skemen – Lepsi – Aqtoǵaı» avtojolynyń qurylysyn «Jol» JShS, «Lepsi – Balqash kóli» avtojolynyń qurylysyn «Qazstroısentr» JShS júrgizip jatyr. Búginde asfalt-beton jabynyn tóseý tolyǵymen aıaqtalyp, jol boıyn abattandyrý jumysy bastaldy. Bıylǵy shomylý maýsymyna deıin jol qurylysy tolyǵymen aıaqtalady dep kútilip otyr.
Avtojoldardy qysqy kútip ustaý da – ózekti másele. Byltyr jergilikti bıýdjetten qomaqty qarjy qarastyrylyp, jol qaýipsizdigin qamtamasyz etý maqsatynda jergilikti 8 mekeme, 84 merdiger uıym jumys atqardy. Oblystyń marshrýttyq jelisi 72 avtobýs baǵytyn qamtıdy. Oǵan 18 tasymaldaýshy, 330 jyljymaly quram qyzmet kórsetedi. Sondaı-aq 31 áleýmettik mańyzy bar qatynas tıesili. Olardyń bári jergilikti kásipkerlik nysandary arqyly júzege asady.
Osy tusta qoǵamdyq kólikte kópbalaly analarǵa jeńildik berilgenin, stýdentter men oqýshylardyń oblys ortalyǵynyń qalaishilik baǵyttarynda tegin jol júretinin de aıta keteıik. Kórý jáne estý qabileti buzylǵan I jáne II toptaǵy múgedektigi bar tulǵalarǵa, aýǵan-tájik soǵysynyń jáne Taýly Qarabaq soǵysynyń ardagerlerine ótken jyly 600 tegin jol júrý bıleti úlestirilse, bıyl 735 bılet usynyldy. Bul da otandyq kásipkerlerdiń turǵyndarǵa kórsetken úlken qoldaýy. «Almaty – Úsharal – Almaty», «Astana – Úsharal – Astana», «Taldyqorǵan – Úsharal – Taldyqorǵan» baǵytyndaǵy áýe joldarynda «Skat», «Qazaq Eır» sııaqty otandyq kompanııalar jolaýshylardy tasymaldaıdy.
Byltyrdan beri «Moıynty – Dostyq» temirjol ýchaskesiniń ekinshi jolynyń qurylysy bastaldy. Oblys aýmaǵynan ótetin ýchaskeniń uzyndyǵy – 451 shaqyrym. Investısııa kólemi 293 mlrd teńgeni quraıdy. Osy jobanyń qurylys jumysyn otandyq kompanııalar atqarsa, jumysshylary – jergilikti turǵyndar. Paıdalanýǵa berilgen soń da jerlesterimiz jumysqa ornalaspaq.
Oblystyq jolaýshy kóligi jáne avtomobıl joldary basqarmasynyń aqparatynsha, oblystyq mańyzy bar avtojoldardyń qurylysy men jóndeý jumysyna «JOL» JShS, «ABZ Karer DRSÝ» JShS, «Alakól joldary» JShS, «Taldyqorǵan joldary» JShS, «Qazqurylysortalyǵy» JShS, «Gordorstroı» JShS jáne basqa da jergilikti kompanııalar atsalysady. Jol qurylysyna otandyq kásiporyndar óndirgen materıaldar qoldanylady.
«Merdiger uıymdardyń oryndaıtyn jumys sapasyn baqylaý basqarma, merdiger mekeme, tehnıkalyq qadaǵalaý, avtorlyq baqylaý jáne «Jol aktıvteriniń ulttyq sapa ortalyǵy» RMK fılıalynyń qatysýymen júzege asady. О́tken jyldan bastap ortasha jóndeý jumysyna tehnıkalyq qadaǵalaý uıymdary qatystyryldy. Budan bólek, aýdandyq mańyzy bar joldar men ishki kóshelerdiń tehnıkalyq qujattamasy Ulttyq sapa jol aktıvteri ortalyǵy arqyly tekseristen ótip, vedomstvolyq saraptamanyń qorytyndysyn alady. Bul óz kezeginde jobanyń negizsiz qymbattaýynyń jolyn kesedi», deıdi Ǵ.Dáribaev
Jetisý oblysy