Oblys ákimdigi mádenıet, arhıvter jáne qujattama basqarmasynyń uıytqy bolýymen, Kenen Ázirbaev atyn-daǵy oblystyq fılarmonııanyń uıymdastyrýymen Jazýshylar odaǵynyń múshesi, aqyn-kompozıtor, Mádenıet salasynyń úzdigi Úmit Bıtenovanyń «Jyrla, júrek!» atty poetıkalyq keshi ótti.
Ádemi ándermen ádiptelip, shuraıly shýmaqtarmen árlengen kesh barysynda «Ázil álemi» teatrynyń akteri Amanǵalı Sypabekov bastap, jergilikti ónerpazdar qoshtap, Ú.Bıtenovanyń avtorlyq ánderin shyrqady.
Qalamgerdiń mereıtoıyna oraılastyrylyp ótkizilgen keshti belgili aqyn Baqyt Bedelhan júrgizdi. Jyrdan shashý shashylǵan ádebı is-sharaǵa arnaıy kelgen Memlekettik syılyqtyń laýreaty Ǵalym Jaılybaı, Jazýshylar odaǵy tóraǵasynyń orynbasary Qasymhan Begmanov izgi tilekterin jetkizdi.
Oblys ákimi apparatynyń basshysy Lesbek Ilebaev, Mádenıet, arhıvter jáne qujattama basqarmasynyń basshysy Erlan Júnisbaı, oblystyq máslıhattyń tóraǵasy Abdaly Nuralıev, sondaı-aq Májilis depýtattary Muqash Eskendirov pen Gúldara Nurymova da aqynǵa degen aqjarma tilekterin aıtyp, shyǵarmashylyǵyna tabys tilep, qurmet kórsetti.
Poezııa tórge ozǵan keshte Asqar Toqpanov atyndaǵy oblystyq qazaq drama teatrynyń ujymy ádebı-lırıkalyq kompozısııa qoıyp, aqyn shyǵarmalaryn teatr tilinde sóıletti.
Atyraý men Altaı arasynan kelgen mártebeli meımandar bul kúni jambyldyq aqynnyń shyǵarmashylyǵy týraly aqjarma tilekterin aıap qalǵan joq.
Is-shara sońynda sóz alǵan mereıtoı ıesi ádebıet álemindegi eńbegin laıyqty baǵalaǵan jergilikti bılik pen alystan at arytyp kelgen qonaqtarǵa, qara óleńge ańsary aýǵan jerlesterine rızashylyǵyn jetkizdi.