Astana qalasynda dzıýdodan ótken «Grand Slam» týrnıri aıaqtaldy. Úsh kúnge ulasqan aıtýly dodaǵa álemniń 84 elinen 450 sportshy qatysyp, doda kórigin qyzdyrdy. Qazaqstan dzıýdo federasııasy men Halyqaralyq dzıýdo federasııasy (IJF) byltyr tórt jylǵa kelisimshart jasasyp, 2026 jylǵa deıin «Qazaqstan Barysy Grand Slam» týrnırin ótkizý múmkindigine ıe boldy. Byltyr Astanada dúrkiregen alaman bıyl da óz bıiginde ótti.
Jazǵy Olımpııa oıyndarynyń qarsańyndaǵy sońǵy «Grand Slam» serııasyndaǵy tartysqa reıtıngtik upaıyn eseleýge umtylǵan kil myqtylar jınaldy. Saıystyń birinshi kúninde erler 60, 66 kg, áıelder 48, 52 jáne 57 kg salmaqta tatamıge shyqqan. Ulttyq quramanyń bas bapkeri Nurbol Súleımenov elorda tórindegi alamanǵa ár salmaqta 4 balýannan qosyp, bir qaınaýy kem jastardyń da tájirıbesin shyńdaýyna múmkindik týǵyzdy. Bir apta merzim buryn Tájikstannyń Dýshanbe qalasynda ótken «Grand Slam» týrnırinde kúmis medal oljalap, mereıimizdi asyrǵan Maǵjan Shamshadın irikteý kezeńin táýir bastaǵanymen, úshinshi aınalymda súrindi. 60 kıloda beldesýge shyqqan Sherzod Davlatov, Dáýren Súıýkenovtiń de qoıý shańnyń arasynda qalatynyn kópshilik sezdi. Jastar arasynan eresekter dýyna jańa qosylǵan jigitterge álemdik dodanyń aýrasyn sezinýdiń ózi olja ekeni anyq. Bul salmaqta álem chempıony, Jazǵy Olımpıada oıyndarynyń eki dúrkin júldegeri, tájirıbeli balýan Eldos Smetov qana abyroıymyzdy asyryp, medal enshiledi. Shırek fınalǵa deıingi qarsylastaryn aıqyn utqanymen, beıtarap sportshy retinde qatysqan Ramazan Abdýllaevqa ese jiberdi. Jubanysh beldesýinde túrikmenstandyq balýandy jyǵyp, qola medal úshin ótken tartysta Ázerbaıjan sportshysyn jeńdi.
«Astana tórindegi tatamıde dodaǵa túspegenime 9 jyldyń júzi bolypty. 2015 jyly álem chempıonatyn elimiz elordada ótkizgende chempıon atanyp edim. Bul joly da barymdy salyp ázirlik júrgizdim. Endigi meje – Parıj Olımpıadasy. Qanjyǵamda álem chempıony ataǵy, Jazǵy Olımpıada oıyndarynyń kúmis, qola medali bar, jetpeı turǵany – altyn júlde. Jaraqatymdy emdetip, úzilisten keıin jattyǵýǵa qaıta oraldym. Ulttyq qurama bapkerleri Parıj alamanyna 60 kg salmaqta kimdi qosatynyn ózderi sheshedi. Senim artsa, barymdy salamyn», dedi álem chempıony.
66 kg salmaq dárejesinde álem chempıonatynyń kúmis júldegeri, talaı dodaǵa túsip ysylǵan tájirıbeli balýan Ǵusman Qyrǵyzbaevtan kópshilik júlde kútken. Alaıda irikteýden asa almady. Kerisinshe, Azııa chempıonatynyń qola júldegeri jas balýan Janarys Rahmetqalı minez kórsetti. Jerebeniń oǵan qıyn soqqany sondaı, alǵashqy aınalymda joly Olımpııa oıyndarynyń eki dúrkin júldegeri ońtústikkoreıalyq An Baýlmen túıisken. Jas qabylan qarsylastyń abyroı ataǵynan yqqan joq, týlaqsha laqtyryp, aıqyn jeńdi. Biraq úshinshi aınalymda qarsylasyna ese jiberip jarysty aıaqtady.
73 kg salmaqta Baqytjan Abdyrahmanov senimdi aqtady. Shırek fınalǵa deıin syralǵy balýandardy yǵystyryp, jartylaı fınalda beıtarap sportshy Danıl Lavrentevke (AIN) jol berdi. Qola medal úshin ótken beldesýde ırlandııalyq Djoshýa Grındi jeńdi.
«Eresekter arasynda mundaı mańyzdy dodaǵa tuńǵysh ret qatystym, áseri ózgeshe bolady eken. Bapkerimniń aıtqan aqylyn, taktıkalyq tapsyrmasyn tyńǵylyqty oryndadym. Jeńiske jetýge umtyldym, biraq tájirıbeniń kem soqqany, qajyr-qaıratymnyń áli de tolyspaǵany ańǵaryldy», dedi jas balýan.
81 kg salmaqta Abylaıhan Jubanazar shveısarııalyq Orelen Bonferronıdi jyǵyp, qola medal aldy. Erler dodasynda ózge salmaqta beldesýge túsken balýandardyń barlyǵy da irikteý kezeńinde-aq kúıreı jeńildi. Abylaıhan irikteý kezeńinde «Grand Slam» dodasynda tórt márte top jaryp, chempıon atanǵan japon Fýdzıvaro Satarony, beıtarap sportshy retinde alamanǵa qatysqan Rıo Olımpıadasynyń chempıony Hasan Halmýrzaevty qapy qaldyrdy.
Qyzdar dodasynda balýandarymyz bir altyn medal oljalady. Jastardyń basym kópshiligi alǵashqy aınalymda kúıreı jeńildi. Tek 48 kg salmaq dárejesinde qurama kóshbasshylarynyń biri Ǵalııa Tynbaeva chempıon atanyp, qazaq sportynda «Grand Slam» týrnırin utqan alǵashqy balýan qyz retinde esimin tarıhqa qashady. Buǵan deıin Mońǵolııadan kelgen Galbadrah Otgonseseg «Grand Slam» syndy aıtýly alamanda top jaryp, mereıimizdi asyrǵan edi. Qazaq sportshylarynyń da qarymdy ekenin Ǵalııa balýan pash etti. Irikteý kezeńinde Týnıs, Taıpeı, Túrkııa sportshylaryn jyǵyp, jartylaı fınalda álem chempıonatynyń kúmis júldegeri «Grand Slam» serııasynda talaı márte top jarǵan tájirıbeli fransýz balýany Shırın Bokýlıden basym tústi. Al fınaldyq tartysta beıtarap sportshy esebinde qatysqan «Grand Slam», «Grand Prix» dodalarynyń chempıony Sabına Gılıazovany súrindirdi. Ǵalııa elorda tórindegi dodada ne bel keter, ne belbeý keter dep zor táýekelge barǵanyn jetkizdi. Elimizde ótken álemdik dodada Ánuranymyzdy shyrqatqan balýan qyz árbir beldesýi jeńil soqpaǵanyn atap ótti.
Jaqsylyq Úshkempirov atyndaǵy Jekpe-jek saraıyn dúbirge bólegen aıtýly alaman da tarıh qoınaýyna ketti. Ulttyq quramanyń bas bapkeri Nurbol Súleımenov elimizde ótken dodaǵa negizinen jastardy qosyp shyńdap alýdy kózdegenin, tájirıbeli tisqaqqan balýandarmen kúsh synasý arqyly ysylatynyn aıtty.
«Jigitter de, qyzdarymyz da baryn salyp kúresti. Kem soqqan, qatelik jibergenderi de bar. Birer kúnde Birikken Arab Ámirlikteriniń Abý-Dabı qalasynda álem chempıonaty ótedi. Sol synnan keıingi meje – Parıj Olımpıadasy. Olımpıadalyq reıtıngte tańdaýly 17 balýannyń sapyna qosylǵan qyz-jigitterge osy eki birdeı mańyzdy dodada senim artamyz», dedi bas bapker.
«Qazaqstan Barysy Grand Slam» týrnırinde chempıon atanǵan balýanǵa – 1 000, kúmis júlde ıegerine – 700, qola medal oljalaǵan balýandarǵa 500 reıtıngtik upaı jazyldy.