Memleket basshysy Qasym-Jomart Toqaev Sıfrlyq damý, ınnovasııa jáne aeroǵarysh ónerkásibi mınıstri Jaslan Mádıevti qabyldady, dep habarlaıdy Egemen.kz Aqorda baspasóz qyzmetine silteme jasap.
Prezıdentke vedomstvonyń qazirgi qyzmeti men jumys jospary týraly baıandaldy. Jaslan Mádıevtiń aıtýynsha, memlekettik basqarýdy jáne basqa da salalardy sıfrlyq transformasııalaý úshin ınstıtýsıonaldyq baza qalyptasqan. Reınjınırıng mindettemesi zań júzinde bekitilip, 600-den astam bıznes-prosess qaıta qaralǵan. Sondaı-aq GovTech platformalyq tásili arqyly sıfrlyq transformasııalaý úderisi bastalǵan.
Qasym-Jomart Toqaevqa jasandy ıntellektini engizý, sondaı-aq AI-driven government ekojúıesin qalyptastyrý joldary jóninde málimet berildi.
Sonymen qatar Memleket basshysyna otandyq IT-kompanııalardyń eksport naryqtaryna shyǵý perspektıvasy týraly baıandaldy.
Kezdesý sońynda Prezıdent memlekettik basqarý isin sapaly túrde sıfrlandyrý, halyqaralyq IT-alpaýyttarmen yntymaqtastyqty jandandyrý jáne ekonomıkanyń túrli sektorynda jasandy ıntellektini odan ári damytý jóninde birqatar tapsyrma berdi.