О́ńir óndirisiniń tamyryna qan júgireıin dedi. Belsendilik pen jańashyldyq lebi ár saladan seziledi. Sonyń biri – turmystyq hımııa óndirisi. Bul baǵyt aımaqta endi qolǵa alynyp, jolǵa qoıylyp kele jatyr. Solardyń qataryndaǵy «Wectrade» kásipornynyń turmystyq hımııasy suranysqa ıe. О́nerkásip kúndelikti turmysta paıdalanatyn qajetti ónimniń barlyq túrin shyǵarady.
«Wectrade» kásipornynan kir jýatyn geldiń, suıyq sabynnyń, mata jumsartqyshtyń, tazalyqqa qajettilerdiń túr-túrin tabasyz. Qol súrtetin maılyqtar, qoqys salatyn paketter, batareıkalar, asúıge qajetti jabdyqtardy da óndiredi.
О́ndiris jetekshisi Aleksandr Býdnıskıı kásiporyndy alǵash qurǵannan bastap kózdegenimiz naryqqa sapaly ónim shyǵarý edi deıdi. Oılaǵandary ońynan kelgen kásiporyn halyqty sapaly ónimmen qamtamasyz etip keledi. Taýarlaryn ózderiniń ınternet-dúkeni arqyly saýdalaıdy. Tipti tıimdi etip úıge deıin jetkizý qyzmetin qosyp qoıǵan. Qaraǵandymen qanattas qalalardan bólek, Astana men Almatynyń suranysyn da qanaǵattandyrady.
– Kompanııamyz jeti jyldan beri jumys istep keledi. Avtohımııa óndirisin az kólemde bastadyq. Turmystyq hımııa óndire bastaǵanymyzǵa úsh jyl boldy. Qazir aıyna 150 tonna daıyn ónim shyǵaramyz. Jalpy, 50-den astam ónim túri bar. Importtyq jabdyqty, shıkizatty shetelden satyp alamyz. Sapany baqylaýǵa arnalǵan jeke zerthana bar. Bastapqyda shaǵyn seh edik. Keıin mekenjaı aýystyryp, keń aýmaqqa ornalastyq. Aýmaǵymyz keń. О́te yńǵaıly. О́ndiristi odan ári damytý úshin múmkindikter bar, – deıdi óndiris jetekshisi Aleksandr Býdnıskıı.
О́ndiris orny irgeli kásiporyndarmen kelisim jasasyp jatyr. Aldaǵy ýaqytta osy aýmaqta óndiriletin turmystyq hımııany «Qarmet», «Kazakhmys» sekildi alpaýyttar turaqty túrde satyp alyp otyrmaq.
О́ndiris oshaǵy – burynǵy mashına jasaý zaýytynyń ornynda. Bul aýmaq osy ýaqytqa deıin bos jatypty. Bul kúnde kásiporynnyń paıdasyna jarap tur. Shaǵyn ónerkásiptik aımaqqa oblys ákiminiń birinshi orynbasary Azamat Taıjanov arnaıy baryp, jumys barysymen tanysty.
Shaǵyn ónerkásip aımaǵynyń aýmaǵy shamamen 13 myń sharshy metrdi quraıdy. Munda ártúrli beıindegi 10 kásiporyn ornalastyrylǵan. Osy aýmaqta qubyrlar men jylytý qazandyqtary, turmystyq hımııa jasalady. Oblys ákiminiń birinshi orynbasary Azamat Taıjanov aımaq basshylyǵy kásibin dóńgeletemin degenderge barlyq jaǵdaı jasalǵanyn aıshyqtap aıtty.
– Bizdiń basty mindetimiz – otandyq taýar óndirýshilerdi qoldaý. Osy baǵytta odan ári jumys isteıtin bolamyz. Turǵyndar úshin jańa jumys oryndaryn qamtamasyz etý maqsatynda shaǵyn jáne orta bızneske jaǵdaı jasaýymyz kerek. Oblysta toqtap turǵan ǵımarattar bazasynda taǵy da birqatar shaǵyn ónerkásiptik aımaqtar qurýdy josparlap otyrmyz. О́tinimder túsip jatyr. Bıyl oblysta jalpy somasy 250 mlrd teńgege 10 ınvestısııalyq joba iske asyrylýda jáne 3 500 jańa jumys orny qurylyp jatyr. Bul rette ımportty almastyrýǵa, básekege qabiletti óndirister qurýǵa basa nazar aýdarylady, – deıdi A.Taıjanov.
Qaraǵandy oblysy