Qulsary qalasyndaǵy zalaldy baǵalaý jáne óteý jónindegi komıssııasy zalaldy baǵalaý nátıjesimen kelisken turǵyndardyń alǵashqy leginen ótinishter qabyldady. Mádenıet úıinde buǵan deıingi júrgizilgen baǵalaýlarǵa sáıkes, ótemaqy tólemderin rásimdeý úshin azamattardy qabyldaý bastaldy. Alǵashqy 6 otbasy zalaldyń ornyn toltyrý maqsatynda tólenetin ótemaqyny alý týraly sheshim qabyldady. О́temaqy turǵyndarǵa 14 kún ishinde tólenetin bolady, dep habarlaıdy Egemen.kz Atyraý oblysynyń Tótenshe jaǵdaı jónindegi jedel shtaby málimetine silteme jasap.
Qalanyń kóptegen turǵyndary mamandardyń zalaldy baǵalaý nátıjelerin oń qabyldap otyr. Sondyqtan da olar qysqa merzim ishinde ótinish berýge nıetti. «Men buǵan deıingi suhbattarymda da aıttym. Ár sharshy metrge 400 myń teńge degen aýadaǵy aqshany suramaımyn. Maǵan qanaǵattanatyn soma berse boldy. Úıimniń ár 1 sharshy metri 240 myń teńgeden baǵalansa rızamyn. Eger meniń úıim 25 mln teńgege baǵalanǵan bolsa, maǵan ár sharshy metrge 240 myń teńgeden tólengeni tipten tıimdi. Meniń otbasym úshin turǵyn úı máselesi óte ótkir tur», dedi Qulsary qalasynyń turǵyny Jaılash Muqanova.
Keltirilgen materıaldyq zalal úshin ótemaqy tóleý úshin qujattardy daıyndaý 10 kúnge sozylady. Qazirgi ýaqytta jyljymaıtyn múlikke tehnıkalyq tekserý jáne baǵalaý júrgizý jalǵasyp jatyr. Qazirgi ýaqytta barlyǵy 2 myń 940 ótinish qabyldanyp, 2 myń 727 ótinish qaraýǵa jiberilgen. 2 myń 624 úıge baǵalaý júrgizilip, 2 myń 671 úıge tehnıkalyq tekserý júrgizildi. 756 apatty úı dep tanyldy.