Memleket basshysy Qasym-Jomart Toqaev Úkimetke el ekonomıkasynyń jyl saıynǵy ósimi 6 paıyzdan kem bolmaýy kerektigi týraly tapsyrma bergeni belgili. Osyǵan oraı Úkimet ekonomıkalyq ósimdi qamtamasyz etý úshin birinshi kezektegi isterdiń josparyn óziniń qaýlysymen bekitken. Qaýlyda jospardyń oryndalýyn baqylaý boıynsha birinshi basshynyń jeke jaýapkershiligi naqtylanǵan.
Soltústik Qazaqstan oblysy ákimdiginiń birinshi toqsannyń áleýmettik-ekonomıkalyq damýynyń qorytyndylaryn qaraǵan otyrysynda ekonomıka basqarmasynyń basshysy Qýanyshbek Qalıjanov qala men aýdan ákimdikterine osy másele boıynsha ınvestısııalyq jobalardy iske asyrý jáne saýda naryǵyn jańǵyrtý, qurylys ınfraqurylymyn jetildirý, turǵyn-úı qurylysy kólemin arttyrý boıynsha mindetter bekitilgenin aıtty. Alaıda osy mindetterge ákimder salǵyrt qaraıtyn sekildi. Sondyqtan bolar, Qýanyshbek Qalıjanov oblys ákimi Ǵaýez Nurmuhametovke: «Úkimettiń tapsyrmasyn sapaly oryndaýǵa tıisti basqarmalar men ákimderge jumysty jandandyrý týraly tapsyrma berýińizdi suraımyn. Sonymen birge ákimderge ekonomıkanyń ósimin qamtamasyz etetin qosalqy ádister tabýdy tapsyrý kerek», dedi. Q.Qalıjanovtyń barlyq jurttyń kózinshe jumsartyp aıtqandaǵy ótinishi osyndaı bolsa, basshylardyń bolbyr áreketi bilinip tur.
Odan ári Qýanyshbek Qalıjanov ekonomıka salalary boıynsha birinshi toqsannyń qorytyndylaryna toqtaldy. Sonyń ishinde aýyl sharýashylyǵy ónimderi boıynsha oblys byltyrmen salystyrǵanda 3,4% ósimge qol jetkizgen. Respýblıka boıynsha osy kórsetkish 1,6% bolypty. Degenmen bul ósim byltyrmen salystyrǵanda tómen, atalǵan merzimde byltyrǵy ósim 4,6% bolǵan eken. Sonyń ishinde mal sharýashylyǵy ónimderiniń ósimi de ótken jylmen salystyrǵanda 1,2%-ǵa tómen bolǵan. Et óndirýdiń ózi 4,4%-ǵa tómendep ketken. Al sút pen jumyrtqanyń ósimi jaqsy, alǵashqysy 12,6%, sońǵysy 7,8%-ǵa artqan.
Úsh aıda ónerkásip ónimderiniń kólemi 177,1 mlrd teńgege jetip, 112,1%-ǵa oryndalǵan. Sonyń ishinde óńdeý ónerkásibi óniminiń ósimi 14,7% bolǵan. Iаǵnı ótken jyldyń sáıkes merziminde 112,2 mlrd teńgeniń ónimi shyǵarylsa, bıyl ol 143,9 mlrd teńgege jetken.
О́nerkásip ónimderiniń negizgi bóligi Petropavl qalasynda jasalady (barlyq ónimniń 71,7% paıyzy). О́nerkásipti órge súırep turǵan kásiporyndar qatarynda «ZIKSTO» AQ, «Maslo del» JShS, «Evrazıan Mılk» JShS, «Radýga» JShS, «Zelenyı Sever» JShS, «ST Assembly» JShS, «Petropavldyń elektrotehnıkalyq zaýyty» JShS bar.
Osy toqsanda ekonomıkaǵa tartylǵan ınvestısııa kólemi 94,6 mlrd teńge bolǵan. Bul byltyrǵydan 48,8%-ǵa artyq. Qurylys salasyndaǵy ósim de qarqyndy. Istelgen jumys kólemi byltyrmen salystyrǵanda 4,8%-ǵa joǵary.
Soltústik Qazaqstan oblysynyń bıyl ádepki toqsanyndaǵy jalpy ekonomıkalyq jaǵdaıy turaqty bolyp, jergilikti bıýdjetke túsken tabys 110,5%-ǵa oryndalyp, 31,8 mlrd teńgege jetken. Jospardan tys alynǵan tabys 3,8 mlrd teńge bolyp otyr. Bul týraly oblystyń qarjy basqarmasynyń basshysy Natalıa Dyshkant jarııalady. Osynaý qarajattyń 17,8 mlrd teńgesi oblystyq bıýdjettiń kiris bóligine alynǵan. Qalǵan 13,9 mlrd teńgesi qala jáne aýdandar bıýdjetine quıylǵan. Dyshkanttyń aıtýynsha, 2024 jyldyń birinshi toqsanyndaǵy shyǵys jospary 100%-ǵa oryndalǵan. Alaıda ol óziniń sózine ózi qarsy kelip, 34,5 mln teńgeniń ıgerilmegenin aıtty. Sonyń 8 mln teńgesi respýblıkalyq bıýdjetten berilgen maqsatty transfert eken. Qarjyger baıandamasyn: «Osy jyldyń birinshi toqsanyndaǵy qorytyndy boıynsha bizdiń oblys bıýdjettiń oryndalýy respýblıka boıynsha eń aldyńǵy qatarda», dep aıaqtady.
Soltústik Qazaqstan oblysy