Tórt jyldyqtyń basty dodasy – Parıj Olımpıadasynyń bastalýyna sanaýly aılar qaldy. Ulttyq qurama sportshylary lısenzııalyq týrnırler men reıtıngtik dodalarǵa qatysyp, qorjyndy meılinshe kóp joldamamen tolyqtyrýǵa bar kúsh-jigerin salyp jatyr. Al lısenzııa alyp qoıǵan otandastarymyz jeke baǵdarlama boıynsha sheberlikterin shyńdap, mańyzdy jarysqa tyńǵylyqty daıyndalyp jatyr, dep habarlaıdy Egemen.kz Týrızm jáne sport mınıstrligine silteme jasap.
Parıj Olımpıadasyna joldama jeńip alǵan sportshynyń biri – boksshy Nurbek Oralbaı. Otandasymyz joldamany bıyl Italııanyń Býsto-Arsısıo qalasynda ótken álemdik irikteý kezeńinde jeńip aldy.
«Apennın túbegindegi týrnırge alty boksshy baryp, sonyń beseýi joldamaǵa qol jetkizdi. Árıne irikteý jarysy bolǵan soń, barlyq boksshynyń maqsaty – Olımpıada joldamasyn jeńip alý ǵoı. Sondyqtan barlyǵymyzǵa jekpe-jekter ońaı bolǵan joq. Meniń salmaǵymda 62 boksshy judyryqtasyp, sonyń tórteýine joldama buıyrdy. Endi biz úshin mańyzdy kezeń bastaldy. Olımpıadaǵa joǵary daıyndyqpen baryp, qazaq elin altyn júldemen qýantýǵa tyrysamyz», deıdi Nurbek Oralbaı. 2000 jyly týǵan sportshy boksqa kezdeısoq kelgen.
«Ákem syńarym Aıbek ekeýmizdi Astanadaǵy «Alataý» sport keshenine ertip apardy. Oıy – kúreske berý edi. Aldymyzdan kezdeısoq Asqar Erkebaev esimdi jattyqtyrýshy jolyqty. Ol kisi: «Men burynnan osyndaı egiz balalardy boksqa baýlyp, solardy chempıon etip tárbıelep shyǵarýdy maqsat tutyp júr edim», dep aıtyp qaldy. Sóıtip ákem qazirgi bapkerime ruqsatyn berdi. Osylaısha, boks zalynan bir-aq shyqtyq», deıdi álem chempıony. «80 kg salmaqtaǵy álem chempıony Nurbek Oralbaıdyń boksqa kelgendegi óz maqsaty bar. Sol maqsatyna jetý úshin tynbaı eńbek etip júr. Bir artyqshylyǵy – ol qarsylasqa óte yńǵaısyz boksshy. Sol sebepti Nurbek – osy Olımpıadada medal kútetin jigitterimizdiń biri», dep pikir bildirdi ulttyq quramanyń bas bapkeri Myrzaǵalı Aıtjanov. Boksshy óziniń basty jankúıeri otbasy ekenin aıtady. «Byltyr О́zbekstan astanasy Tashkentte ótken álem chempıonatyna ata-anamyz biz úshin baryp, qoldaý kórsetýi qosymsha kúsh berdi, senimdiligimizdi arttyrdy. Biz de ata-anamyzdy, qoldap otyrǵan jankúıerlerdi qýantý úshin ár jekpe-jekte, jarystarda jeńiske jetýge tyrysamyz», deıdi Nurbek Oralbaı.