Senattyń Áleýmettik-mádenı damý jáne ǵylym komıtetiniń tóraǵasy Nurtóre Júsip QR Densaýlyq saqtaý mınıstri Aqmaral Álnazarovamen kezdesti, dep jazady Egemen.kz.
Júzdesýge qatysýshylar azamattardyń densaýlyq saqtaý júıesin damytý, medısınalyq qyzmet kórsetý sapasyn baqylaý, halyqtyń sanıtarlyq-epıdemıologııalyq salaýattylyǵy, sondaı-aq azamattardy mindetti áleýmettik medısınalyq saqtandyrýdyń tıimdiligi máselelerin talqylady.
Nurtóre Júsip elimizdegi densaýlyq saqtaý máselesine senatorlar erekshe nazar aýdaryp otyrǵanyn atap ótti. Olardyń qatarynda medısınalyq qyzmetterdiń sapasy men ýaqytynda kórsetý problemasy, dárilik preparattardyń jetispeýshiligi jáne jańa turpattaǵy bilikti medısına qyzmetkerlerin daıarlaý máseleleri bar.
«Medısınalyq saqtandyrý júıesin qarjylandyrýǵa qaramastan onyń jumysyndaǵy tıimdilik máselesin Prezıdent birneshe ret atap ótken edi. Depýtattyq korpýs Prezıdenttiń tapsyrmasy men halyqtyń erik-jigerin sapaly oryndaý maqsatynda Úkimet atynan sizdiń mınıstrlik qoldanystaǵy NQA men medısınalyq qyzmet kórsetý tetikterin túbegeıli qaıta qaraýy tıis dep sanaıdy. Qajet bolǵan jaǵdaıda Memleket basshysynyń tapsyrmasyn sapaly jáne ýaqtyly oryndaýǵa baǵyttalǵan keshendi sharalardyń bári qamtylǵan tıisti qujattar ázirlenýi tıis. Senatorlar osy mindetterdi iske asyrýda jan-jaqty kómek kórsetýge daıyn», dedi Nurtóre Júsip.
Aqmaral Álnazarova óz kezeginde densaýlyq saqtaý mınıstrliginde júzege asyp jatqan sapaly medısınalyq kómekke jaǵdaı jasaýǵa baǵyttalǵan jumystar týraly aıtyp berdi. Olardyń qatarynda farmasevtıka salasyndaǵy ǵylymı áleýetti damytý, medısınalyq qyzmetterdiń sapasy men jedeldigin jaqsartý, sondaı-aq densaýlyq saqtaý salasyndaǵy normatıvtik-quqyqtyq bazany turaqty jaqsartýdy kózdeıtin aýqymdy ister bar.