Batys Qazaqstan oblysynda tasqyn sýdan zardap shekken eldi mekenderdiń birqatarynda dezınfeksııalaý jumysy aıaqtaldy. Bul týraly oblys ákiminiń baspasóz qyzmeti habarlady.
О́ńirde naýryz aıynyń sońynda áýeli Qaldyǵaıty, Ańqaty, Shiderti sekildi shaǵyn ózender tasysa, keıin transshekaralyq Qaraózen men Saryózen, Shaǵan men Derkól, Jaıyq ózenderi de arnasynan asyp, asaý minez kórsetti. Tasyǵan sý kóp jerde turǵyn úı men mal-múlikti ǵana emes, áleýmettik qurylymdarǵa, sonyń ishinde aýyzsýmen qamtý júıesine de zaqym keltirdi.
Oblystyq sanıtarlyq-epıdemıologııalyq baqylaý basqarmasynyń dereginshe, sý ketken aýdandardyń eldi mekenderinde, ıaǵnı Báıterek, Qaratóbe, Bórli, Terekti, Syrym aýdandaryndaǵy turǵyn úılerdi, sondaı-aq Qaztalov aýdanynyń sý basqan 2 sý qubyryn dezınfeksııalaý sharasy aıaqtalyp qalǵan. Bul jerlerde endi sý saraptamasy júrgizilmek.
Qazir qalpyna keltirilgen ortalyqtandyrylǵan sý júıesindegi sý da zerttelip, qaýipsizdik sharasy jasalyp jatyr eken. Sý tasqyny bastalǵannan beri mamandar barlyǵy 1 625 márte sý synamasyn zertteýge alǵan. Onyń ishinde 817 synamaǵa mıkrobıologııalyq zertteý, 808 synamaǵa sanıtarlyq-hımııalyq zertteý jasalǵan.
Buǵan qosa ortalyqtandyrylmaǵan sýmen jabdyqtaý júıesin de zertteýge sanıtarlyq-mıkrobıologııalyq 17 synama jáne sanıtarlyq-hımııalyq zertteýlerge 17 synama alynypty.
«Zerthanalyq taldaý nátıjeleri sýdyń sapasy talapqa saı ekenin, qaýipsizdigin, alynǵan barlyq synamada juqpaly aýrýlardyń órshý qaýpi joqtyǵyn kórsetti», deıdi mamandar.
Búginge deıin barlyǵy 724 turǵyn úı, 577 káriz, 3 sý qubyry dezınfeksııalanǵan. Sonyń ishinde Syrym aýdany Qosaral aýylynyń 1 sý qubyry, Qaztalov aýdanyndaǵy ortalyq qubyr men Ájibaı aýylynyń sý qubyry bar.
Oral qalasy mańyndaǵy saıajaılarda dezınfeksııalaý jumysy sý ketken soń bastalady. Jaıyq boıyn jaǵalaı jatqan Aqjaıyq aýdanynda 45 eldi meken bolsa, sonyń 32-si ózen boıynda ornalasqan. Bıylǵy tasqynnan aýyldar aman bolǵanymen, 7 aýyldyq okrýgke qarasty 12 aýyldyń sý aıdaý nysandary ótken aptada sý astynda qalǵan. Qazir bul aýyldarda aldyn ala rezervýarlarǵa jınalyp alynǵan sý turǵyndarǵa kestemen berilip jatyr. Odan bólek, árkim óz aýlasyndaǵy quıma qudyqtarǵa sý jınap alyp, amaldap otyr. Keı aýyldarǵa aýyzsýdy kólikpen tasymaldaý uıymdastyrylǵan.
Aqjaıyq aýdany ákiminiń orynbasary Beıimbet Ǵızzatovtyń aıtýynsha, aýyzsýdan turǵyndar tapshylyq kórmeıdi.
– Halyqty aýyzsýmen qamtý maqsatynda sý tasıtyn 6 kólik qyzmet etip jatyr. Onyń ekeýi «Jaıyqtehservıs» kommýnaldyq mekemesi quzyryndaǵy sý tasyǵysh tehnıkasy bolsa, qalǵan tórteýi oblysqa materıaldyq rezervten berilgen. Sý deńgeıi túsken jaǵdaıda sanıtarlyq tekserý-tazalaý jumysyn ótkerip, ortalyqtandyrylǵan sý júıesin qaıtadan qalpyna keltiremiz, – deıdi aýdan ákimi orynbasary.
Aıta keteıik, epıdemııaǵa qarsy is-sharalardy oblys ákimi Narıman Tóreǵalıev tikeleı óz baqylaýynda ustap otyr.
Batys Qazaqstan oblysy