О́tken jyly Ertis-Baıan óńirinde múgedektigi bar adamdardyń zańdy quqyqtaryn qamtamasyz etý jáne olar úshin qoljetimdi ortany qalyptastyrý maqsatynda 225 áleýmettik ınfraqurylym nysany qaıta beıimdelgen. Qoǵamda qoljetimdi orta qurý mindetteri birtindep iske asyp keledi.
Qazirgi ýaqytta elimizde 2025 jylǵa deıin Qazaqstanda múgedektigi bar adamdardyń quqyqtaryn qamtamasyz etý jáne ómir súrý sapasyn jaqsartý jónindegi ulttyq jospar, Amanat partııasynyń 2023-2027 jyldarǵa arnalǵan jol kartasy jáne Memleket basshysynyń tapsyrmasy boıynsha ázirlengen «Halyqpen birge» jobasy iske asyrylyp jatyr. Jobada qoljetimdiliktiń ınteraktıvti kartasy saıtyna engizilgen el boıynsha beıimdelýge tıis 35 myńnan asa basym nysandar aıqyndaldy. Onyń aıasynda 2021-2022 jyldary 8 myńnan asa nysan beıimdeldi. Al ótken jyldan bastap 2027 jylǵa deıin jyl saıyn keminde 5 myń nysan (5 jylda 27 myń) beıimdelýge tıis degen jospar bar. Keıingi úsh jyldyń qorytyndysy boıynsha elimizde 13 857 nysan osy talapqa sáıkestendirildi.
Pavlodar oblysynda byltyr beıimdelýge josparlanǵan 276 nysannyń ishinen jergilikti atqarýshy organdar 225 nysanda múgedektigi bar adamdardyń barlyq sanaty úshin beıimdeý jumystaryn júrgizdi. Atap aıtqanda, 108 nysan – bilim berý, 20 nysan – densaýlyq saqtaý, 46-sy – memlekettik mekemeler jáne taǵy basqalar.
«Meniń baıqaýymsha, densaýlyq jaǵdaıynyń erekshelikterine baılanysty múgedektigi bar adamdar úshin qoljetimdilikti qamtamasyz etý boıynsha Pavlodar qalasyndaǵy jaǵdaı jyl sanap jaqsaryp keledi. Memlekettik mekemeler men jeke ǵımarattardyń ıeleri (dúkender, dárihanalar, t.b.) óz nysandaryn qurylys normalaryna sáıkestendirip jatyr. Mysal úshin, men úıimizdiń janynda ornalasqan dúkenge, Qamzın kóshesindegi poshta bólimshesine, ortalyq stadıonǵa múgedektigi bar adamdardyń kreslo-arbamen kirý máselesi boıynsha kóńilim tolmaıtynyn aıtyp, eskertý jasaǵan edim. О́tinishterim tyńdalyp, barlyǵy túzetildi, tabaldyryqtar, pandýs ornatyldy», deıdi birinshi top múgedektigi bar Nurlan Qadyrqulov.
Eńbek jáne áleýmettik qorǵaý komıtetiniń Pavlodar oblysy boıynsha aýmaqtyq departamenti memlekettik basqarý, densaýlyq saqtaý, áleýmettik qorǵaý, mádenıet jáne ózge de salalardaǵy áleýmettik ınfraqurylym nysandaryna 70 tekserý júrgizgen. Onyń qorytyndysy boıynsha anyqtalǵan kemshilikterdi joıý týraly 65 uıǵarym berildi, 2,5 mln teńgeden asa somaǵa 12 ákimshilik aıyppul salyndy.
Pavlodar oblysy