Tarazda qańtar oqıǵasy kezinde urlanǵan qarýmen kisi óltirgen kúdikti qolǵa tústi. 28 jastaǵy azamat óz dosyn abaısyzda atyp tastaǵan, dep habarlaıdy Egemen.kz.
KTK telearnasy jazǵandaı, oqys oqıǵa keshe Tarazdaǵy móltekaýdandardyń birinde bolǵan. Kúdikti Kalashnıkov avtomatyn qańtar oqıǵasy kezinde urlap alǵan.
Polısııa departamentiniń habarlaýynsha, ol qoımadan urlanǵan atys qarýyn osy ýaqytqa deıin zańsyz saqtap kelgen. Sol avtomat abaısyzda atylyp, qańǵyǵan oqtan dosy ajal qushty. Qazir kúdikti ustalyp, ýaqytsha ustaý ızolıatoryna qamalǵan. Oǵan kisi óltirý babymen is qozǵalyp, tergeý júrip jatyr.
- Qajetti saraptamalar taǵıyndaldy, Aldyn ala aqparat boıynsha, qarý qańtar oqıǵasy kezinde Jambyl oblysynyń PD urlanǵan. Qazir olardyń atalǵan oqıǵalarǵa qatystylyǵy tekserilýde, - dedi Jambyl oblysy PD baspasóz qyzmetiniń jetekshisi Gúlsara Muhtarqulova.