Elimizdiń oqýshylary keıingi kezde halyqaralyq dodalarda daralanyp, elge jıi oljaly oralyp júr. Bul basqa da balalardyń qyzyǵýshylyǵyn oıatyp, bilim báıgelerine qatysýǵa shabyttandyratyny sózsiz.
Sheteldik ýnıversıtettiń grantyn ıelendi
Taqyryp tóńiregindegi súıinshi jańalyqtyń sońǵysy – otandyq oqýshylardyń Regeneron ISEF halyqaralyq ǵylymı-ınjenerlik kórmede bedeldi marapattarǵa ıe bolǵany týraly aqparat. 11-17 mamyr aralyǵynda Los-Andjeleste oqýshylarǵa arnalǵan dúnıejúzilik ǵylymı-ınjenerlik Regeneron ISEF 2024 baıqaýy ótken edi.
Oqý-aǵartý mınıstrliginiń habarlaýynsha, elimizdiń úsh oqýshysy bedeldi marapattarǵa ıe bolyp, 100% nátıjege qol jetkizdi. Jobadaǵy jetistikteri úshin Ábilmansur Rahmetýllaev, Saıajan Jaqsyǵalıeva jáne Álıhan Jarbolov túrli sanat boıynsha úzdik dep tanylyp, jobadaǵy eńbegin baǵalaý dıplomdaryn ıelendi. Sondaı-aq daryndy jas ǵalymdar Korol Abdýlazız jáne onyń seriktesteri qory atynan «Maýhıba» arnaıy syılyqtaryn oljalady. Olarǵa Saýd Arabııasyndaǵy bedeldi memlekettik Korol Fahd munaı jáne mıneraldar ýnıversıtetinde oqý úshin tolyq qarjylandyrylǵan bilim granttary tabystaldy. Arnaıy syılyq qatysýshylarǵa qarjylyq máselelerge alańdamaı, oqýyn jalǵastyrýǵa jaǵdaı jasaıdy. Bul olardyń akademııalyq jáne ǵylymı jumystarǵa nazar aýdarýyna múmkindik beredi.
Aıta ketý kerek, Regeneron ISEF – 70-ten asa elden 2000-ǵa jýyq qatysýshynyń basyn qosyp, olarǵa ózderiniń ınnovasııalyq ázirlemelerin kórsetýge, dúnıejúzindegi áriptesterimen tájirıbe almasýǵa múmkindik beretin aýqymdy baıqaý.
El qorjynyna 9 medal saldy
Jaqynda hımııa páninen oqýshylarǵa arnalǵan 58-Halyqaralyq Mendeleev olımpıadasynyń qorytyndysy shyqty. Shenchjen qalasynda (Qytaı) ótken jarysqa 29 elden 200-den asa oqýshy qatysyp, ózara 15 altyn, 30 kúmis, 45 qola júldeni talasqa saldy. Qazaqstan qurama komandasy 1 altyn, 2 kúmis jáne 6 qola, barlyǵy 9 medal jeńip aldy.
Tarqatyp aıtqanda, Pavlodar qalasyndaǵy №8 daryndy balalarǵa arnalǵan lıseıdiń oqýshysy Rınat Ilıýsızov halyqaralyq bilim báıgesinen el qorjynyna altyn medal saldy. Aqtaý qalasynyń «Bilim-ınnovasııa» lıseı-ınternatynan Ádiljan Moldaǵul men Astana qalasynyń fızıka-matematıka baǵytyndaǵy Nazarbaev zııatkerlik mektebinen Kırıll Kım kúmis medal ıelense, Astana qalasynyń fızıka-matematıka baǵytyndaǵy Nazarbaev zııatkerlik mektebinen Abylaı Qabdýlhadyr, Haileybury Almaty halyqaralyq mektebinen Alıhan Serikuly, Almaty qalasynyń hımııa-bıologııa baǵytyndaǵy Nazarbaev zııatkerlik mektebinen Eńlik Baqytbekova, Pavlodar qalasynyń hımııa-bıologııa baǵytyndaǵy Nazarbaev zııatkerlik mektebinen Tamıla Rahımbaeva, Qaraǵandy qalasynyń m№1 «Bilim-ınnovasııa» mektep-ınternatynan Sanjar Qalıaqbar, Aqtaý qalasynyń «Bilim-ınnovasııa» mektep-ınternatynan Álibı Muǵalim qola medal oljalady.
Myqtylardyń qataryna qosyldy
Elimizdiń oqýshylary Balqan túbegindegi eń myqty jas matematıkterdiń úshtigine kirdi. Osy aıdyń basynda Bolgarııanyń Varna qalasynda matematıkadan 41-Balqan olımpıadasy (BMO) aıaqtalǵan edi. Oǵan 22 elden 130-dan asa oqýshy qatysty. Bilim dodasynda bizdiń oqýshylarymyz jalpykomandalyq úshinshi oryndy jeńip aldy. Ulttyq qurama qorjynynda 1 altyn, 2 kúmis jáne 3 qola bar.
Atalǵan halyqaralyq bilim báıgesinde el namysyn Qostanaı qalasyndaǵy «Bilim-ınnovasııa» mektep-lıseıiniń 10-synyp oqýshysy Jan Daýtov, Almaty qalasyndaǵy RFMM 10-synyp oqýshysy Ámirlan Amanjolov, Almaty qalasyndaǵy Haileybury Almaty halyqaralyq mektebiniń 12-synyp oqýshysy Mıron Iýrkevıch, Taraz qalasyndaǵy «Bilim-ınnovasııa» mektep-lıseıiniń 10-synyp oqýshysy Marǵulan Sharel, Almaty qalasyndaǵy RFMM 10-synyp oqýshysy Tımýr Murat, Almaty qalasyndaǵy RFMM 10-synyp oqýshysy Ámir Sahıpovtan quralǵan qurama qorǵady. Olarǵa KBTU-diń akademııalyq suraqtar jónindegi prorektory, PhD, professor Asylbek Isahov pen matematıkadan respýblıkalyq, halyqaralyq olımpıadalardyń júldegeri Qanat Satylhanov jetekshilik etti.
Endi matematıkadan 41-Balqan olımpıadasyna qatysqan osy Qazaqstan qurama komandasy bıylǵy 11-24 shilde aralyǵynda Ulybrıtanııada ótetin matematıkadan halyqaralyq olımpıadaǵa (IMO) da barady.
Birinshi oryndy ıelendi
О́tken aptada ozat oqýshylarymyzdyń Qytaıdyń Shanhaı qalasynda 18-19 mamyrda ótetin robottehnıka boıynsha «First Tech Challenge China» halyqaralyq chempıonatyna attanǵany týraly jazǵan edik. Osy materıaldy jazyp jatqanda, atalǵan chempıonattyń nátıjesi shyqqany jóninde habar aldyq.
«First Tech Challenge China» halyqaralyq chempıonatyna Qytaı, Japonııa jáne Qazaqstannan jınalǵan 50 komanda qatysyp, 600-den asa qatysýshy baq synady. Abaı oblysynyń jańadan qurylǵan «Tengri» qurama komandasy Robot game atalymy boıynsha II oryn alsa, Motivate award atalymynda úzdik komanda retinde I oryn ıelendi. Jalpykomandalyq esepte úsh eldiń arasynda II oryn aldy. Komanda quramy Shákárim atyndaǵy kópbeıindi №5 gımnazııasynyń oqýshylary: Temirlan Abylhan, Radmır Jeńisbek, Osman Qýanyshbekov, Baljan Naımanǵazına, Dosjan Sabıt, Nurtóre Maqsatuly, Nurken Tóleýbek, Alan Ermekbaev. Komanda jetekshisi – atalǵan mekteptiń robottehnıka pániniń muǵalimi Aıdos Tursynbekov.
Oıyn barysynda atalǵan otandyq komanda avtonomdyq rejimde robottardy jarystyryp, robot baqylaý oınynda pıksel jınady. Sońǵy 30 sekýnd ishinde robot dron ushyryp, týrnıkke tartyldy.
P.S. Eske sala keteıik, 7 (IMO – matematıka, IphO – fızıka, IchO – hımııa, IBO – bıologııa, IgeO – geografııa, IOI – ınformatıka jáne IOL – lıngvıstıka) bedeldi pán olımpıadasynyń júldegerlerine (altyn medal úshin 1 500 AEK – 5 mln 538 myń teńge, kúmis medalǵa 1 000 AEK – 3 mln 692 myń teńge, qola medalǵa 500 AEK – 1 mln 846 myń teńge kóleminde) bir rettik aqshalaı syıaqy beriledi. Osyǵan qosa olar UBT tapsyrmaı-aq otandyq joǵary oqý ornynda tegin bilim alý múmkindigine de ıe bolady.