Birikken Arab Ámirlikteriniń (BAÁ) astanasy Abý-Dabıde dzıýdodan álem chempıonatynyń jalaýy jelbiredi. Bul jarysta 109 memleketten kelgen 675 sportshy baq synap jatyr. Solardyń qatarynda elimizdiń beldi balýandary da bar.
Jarystyń alǵashqy kúni tórt jerlesimiz tatamıge shyqty. Solardyń arasynan tek Ábıba Ábýjaqynovanyń jeńis tuǵyryna kóterilýge shamasy jetti. 48 kg salmaqta synǵa túsken arýymyz alǵashqy aınalymdarda túrkııalyq Sıla Ersin men slovakııalyq Marýsa Stanganrge san soqtyrsa, shırek fınalda brazılııalyq Natasha Fereıradan basym tústi. Jartylaı fınalda Ábýjaqynovanyń mońǵolııalyq Baasanhýý Bavýýdorjge áli jetpedi. Úshinshi oryn úshin tartysta Ábıbanyń joly Túrkııanyń taǵy bir burymdysy Týgche Bedermen qıysty. Bul beldesýde Ábıba qarsylasyn «ıpponmen» utty. Sóıtip, qazaqtyń qaısar qyzy álem chempıonatynyń qola júldegeri atandy. Ábıba osydan eki jyl buryn Tashkentte ótken dúnıejúzilik dodada da dál osyndaı nátıjege qol jetkizgen edi.
60 kg salmaq dárejesinde saıysqa túsken Eldos Smetovtiń de úzdikter qatarynan kórinýge jaqsy múmkindigi boldy. Bastapqy básekelerde ol vetnamdyq Chý Vang, ońtústikkoreıalyq Kım Von Djın, brazılııalyq Mıgel Avgýstodan aılasyn asyrdy. Shırek fınalda reseılik Aıýb Blıevpen ábden tiresti. Basymdyq bizdiń balýan jaǵynda boldy. Negizi ýaqyt teń aıaqtalyp, «golden-skorda» Eldos ádis jasaımyn dep, Blıevtiń «qaqpanyna» túsip qaldy. Jubanysh kezdesýinde qazaqtyń ataqty dzıýdoshysy fransııalyq Romen Valade-Pıkardy utqanymen, úshinshi oryn úshin básekede japonııalyq Taıkı Nakamýraǵa jol berdi.
Jarystyń alǵashqy kúni tatamıge shyqqan ózge eki balýanymyz jaıynda aıtar bolsaq, olardyń óneri kórermender kóńilinen shyqpady. Tusaýkeser kezdesýinde Ǵalııa Tynbaeva (48 kg) Brazılııanyń myqtysy Amanda Lımany jeńgende, jerlesimiz alysqa baratyn shyǵar dep oıladyq. Biraq Tynbaeva ekinshi aınalymda ıspanııalyq Laýra Martınez-Abelenadan aılasyn asyra almady. Nurqanat Serikbaev (60 kg) ta ekinshi kezeńde súrindi. Ony Ońtústik Koreıanyń oǵylany Lı Harım toqtatty.
Jeńimpazdar men júldegerler
Áıelder. 48 kg: 1. Baasanhýý Bavýýdorj (Mońǵolııa), 2. Assýnta Skýtto (Italııa), 3. Ábıba Ábýjaqynova (Qazaqstan) men Tara Babýlfath (Shvesııa).
52 kg: 1. Odette Djýffrıda (Italııa), 2. Dıora Keldıerova (О́zbekstan), 3. Amandın Bıýshar (Fransııa) men Masha Balhaýs (Germanııa).
Erler. 60 kg: 1. Georgıı Sardalashvılı (Grýzııa), 2. Iаng Iýng Veı (Taıpeı), 3.Taıkı Nakamýra (Japonııa) men Lı Harım (Ońtústik Koreıa).