Búgin Úkimet otyrysynan keıin ótken brıfıngte Ǵylym jáne joǵary bilim mınıstri Saıasat Nurbek 2025 jyly ótetin UBT formatynda ózgeris engiziletinin habarlady. Keler jyly test tapsyrýdyń jańa formaty pılottyq joba retinde iske qosylady, dep jazady Egemen.kz kaz.inform.kz-ke silteme jasap.
Saıasat Nurbek ortalyqtandyrylmaǵan joǵarǵy oqýǵa túsý júıesine qaramastan, kem degende stýdentterdi baǵalaý, salystyrý jáne irikteý úshin belgili bir standart qajet ekenin atap ótti.
«Mınıstrlik 2021 jyldan bastap Dúnıejúzilik banktiń qoldaýymen UBT formatyn qaıta qurý jáne eń bastysy – test suraqtarynyń mazmunyn túbegeıli qaıta óńdeý boıynsha úlken jobany iske qosty. Aldyńǵy jyly biz eki baǵyt boıynsha jumys istedik. Birinshisi – SIT sııaqty túbegeıli jańa format boıynsha testterdi daıyndaý, barlyq suraqtardy mazmundy túrde qaıta qaraý. О́tken aptada bul komponent aıaqtaldy. Test daıyndaýdy álemge áıgili fransýz kompanııasy júrgizdi. Jańa model boıynsha 350 testolog daıyndaldy», dedi Ǵylym jáne joǵary bilim mınıstri.
Mınıstrdiń aıtýynsha, jańa model boıynsha daıyndalǵan mamandar endi SIT formatyna uqsas jańa ádisteme boıynsha suraqtar daıyndaıdy. Saıasat Nurbek basqaratyn vedomostvo bıyl UBT boıynsha aýqymdy pılottyq jobany júzege asyrý tetikterin engizý daıyndyǵyna kirisedi.
«Biz bazany qurǵanda jańa UBT formatyn pılottyq túrde bastaý úshin kem degende 50 myń suraq ázirleýimiz kerek. Munda óte muqııat, uqypty bolýymyz qajet, óıtkeni formattyń kúrt ózgerýi de úlken problemalarǵa alyp keledi, joǵary synyp oqýshylaryn osy formatqa daıyndaý qajet. Biz pılottyq jobany kelesi jyly bastaımyz, joba UBT formatyn birden ózgertpeıdi, belgili bir pılottyq rejımde iske qosylady. Birte-birte biz SIT halyqaralyq standartyna kóshemiz, onda árbir talapker ózi testileý ornyn, ýaqytyn tańdaıdy, daıyndalady, tapsyrady, sertıfıkat alady, sonymen oqýǵa túsedi», dedi Saıasat Nurbek.