«Taza Qazaqstan» respýblıkalyq aksııasyna Ertis-Baıan óńiriniń jurtshylyǵy belsene atsalysyp jatyr. Osy aptada «Jasyl aımaq» aptalyǵy jarııalanyp, barlyq aýdan-qalalarda aǵash kóshetteri otyrǵyzyla bastady. Aǵa býyn mundaı ekologııalyq is-shara jas urpaqty qorshaǵan ortany qorǵaýǵa baýlýǵa úlken sep bolady degen pikirde.
Maprýza Hamıtova óńirdegi eń shalǵaı eldi mekenniń biri Shaldaı aýylynda turady. Shaldaı – aınalasyn jalqaraı orman kómkergen, aıryqsha ásem jerde ornalasqan aýyl. Bul ólkede qonys etken jurtshylyq ejelden jasyl ormandy saqtaýdyń mańyzyn jaqsy biledi. Qaraǵaı arasyndaǵy halyq balalaryna únemi qorshaǵan ortaǵa qamqor bolýdyń dánin egip, bul baǵytta isterimen de úlgi-ónege bolyp keledi.
– Joldasym kóp jyl boıy jergilikti orman sharýashylyǵynda ormanshy bolyp eńbek etti. О́zim aýylda esepshi bolyp qyzmet qyldym. Qazir zeınet jasynda bolsam da, eńbek etýdi jalǵastyryp otyrǵan jaıym bar. Ekeýmizdiń de jasymyz – 66-da, birge tútin tútetkenimizge 43 jyl ótipti. Osy ýaqyt ishinde tórt qyzymyzdy aman-esen tárbıelep ósirip, olardan 17 jıen súıdik. Qaraǵaı arasynda týyp-óskendikten jasyl jelekti kóbeıtýdiń ıgiligin jaqsy bilemin. Otaǵasy ekeýmiz ár kóktemde kóshet otyrǵyzýdy kezinde qyzdarymyzǵa úıretip kelsek, qazir jıenderimizdiń qulaǵyna sińirýdemiz. Aýylymyzda búgin «Otbasy aǵashy» aksııasy uıymdastyryldy. Biz sııaqty uzaq jyl otasqandar, kópbalaly jáne jas otbasylar aýyl ishindegi alleıaǵa jınalyp, 100-den asa qaraǵaı kóshetin ektik. Jas balalar mundaı ekologııalyq is-sharalardan kóp tárbıe alady dep oılaımyn. Aınalamyz únemi taza, jasyl jelekke malynyp tursa, adamnyń da kóńil kúıi kóterińki júredi. Sebebi taza aýa – myqty densaýlyqtyń kepili. Al kez kelgen jasyl jelek – bizdiń «ókpemiz», – deıdi Maprýza Qarataıqyzy.
Bul kúni Pavlodar, Ekibastuz, Aqsý qalalary men Sharbaqty, Aqqýly, Baıanaýyl, Aqtoǵaı aýdandarynda jalpy sany 565 túp qaraǵaı, mamyrgúl jáne qaıyń aǵashtary otyrǵyzylǵan. Kóshet otyrǵyzýǵa jergilikti jurtshylyq, ardagerler, jastar, etnomádenı birlestikter men úkimettik emes uıymdardyń ókilderi, máslıhattardyń depýtattary men ustazdar qaýymy qatysty. Máselen, Pavlodar qalasyndaǵy jastar bastamalaryn damytý ortalyǵy Áleýmettik jobalar qorymen birlesip ekologııalyq aksııany jalǵastyrdy. Onyń aıasynda Pavlov jáne Lomov kósheleriniń boıyndaǵy birneshe ǵımarat mańynda jańadan tal-terek egildi. Uıymdastyrýshylar bul is-shara «Birgemiz: Taza Alem» jalpyqoǵamdyq jobasynyń aıasynda qolǵa alynyp otyrǵanyn atap ótti.
«Bul bizdiń qalamyzdyń ekologııasyn jaqsarta túsýge qosqan úlesimiz dep bilemin. Qoǵamdyq oryndardaǵy jasyl jelekti kóbeıte jáne ony ózgelerge nasıhattaı otyryp biz jastardy tabıǵatty aıalaýǵa jáne adal eńbektenýge úıretemiz», dep pikirimen bólisti Áleýmettik jobalar qorynyń jetekshisi Erbol Keńgirbaev.
«Taza Qazaqstan» aksııasynda bul kúni Baıanaýyl men Aqqýly aýdandarynyń halqy da belsendilik kórsetti. «Jasyl aımaq» aptalyǵyna ún qosqan jurtshylyq júzdegen qaraǵaı kóshetin kósheler men qoǵamdyq oryndarǵa otyrǵyzdy. Baıanaýyl aýdandyq ardagerler keńesiniń tóraǵasy Qaırat Sarbasov eldi mekenderdi kógaldandyrýǵa jerlesterin shaqyra otyryp, aldaǵy ýaqytta aǵash egý ıgi dástúrge aınalsa degen nıetin jetkizdi. Onyń aıtýynsha, óńirdegi ekojúıeni jaqsarta túsý osyndaı shaǵyn qadamdardan bastalady. Ári mundaı is-sharalarǵa oqýshylardy kóptep tartsaq, nur ústine nur bolmaqshy.
Al Aqtoǵaı aýdanynda Aýǵanstannan keńes áskeriniń shyǵarylǵanyna 35 jyl tolýyna oraı Aýǵan soǵysy ardagerlerine arnalǵan saıabaqta 35 kóshet otyrǵyzyldy. Aksııa qurmetine oraı turǵyndar úshin konsert uıymdastyrylyp, ystyq shaı men baýyrsaq taratyldy.
Pavlodar oblysy