Syr óńirinde turǵyndardyń ekologııalyq mádenıetin kóterýdi kózdegen «Taza Qazaqstan» respýblıkalyq aksııasynyń ár kezeńi utymdy uıymdastyrylyp, tazalyqqa jumylǵan jurttyń qatary kóp boldy. Memleket basshysy bastamashy bolǵan aksııa aıasynda oblys pen aýdan ortalyqtary ǵana emes, aýyldarda da myńdaǵan kóshet egilip, kúl-qoqys shyǵaryldy. Bir-birine jalǵasqan senbilikter nátıjesinde sý aıdyndary men ózen-kól jaǵalaýlary tazartyldy.
Aksııa bastalǵan 9 sáýir kúni oblys ákimi Nurlybek Nálibaev úndeý jarııalap, onda ár úıdiń tazalyǵy tutas qala men aýyldyń tazalyǵy ekenin aıtqan edi. «Taza ólke» ataýymen bastalǵan aksııaǵa alǵashqy qatarda ún qosqan Syrdarııa aýdanyndaǵy Naǵı Ilııasov aýyly boldy. Oblystaǵy «Úlgili aýyl» baıqaýynyń jeńimpazy atanǵan eldi meken turǵyndarynyń sany 2 myńnan asady. Solardyń 150-ge jýyǵy «Taza ólke» aptalyǵyn bastap, aýyldaǵy alleıalar jáne aryqtardy tazartty.
Jalpy, jyl basynan beri aýdanda 6 myńǵa jýyq aǵash otyrǵyzylyp, tazalyq jumystary júıeli uıymdastyrylyp keledi. Tazalyqqa arnalǵan «Kıeli meken», «Jasyl aımaq», «О́negeli urpaq», «Móldir bulaq» aptalyqtarynda da oblys halqy uıymshyldyq tanytyp, ortaq iske úlken úles qosty.
Byltyrdan bastap oblysta «Úlgili eldi meken» konkýrsy turaqty ótkizilip keledi. Ondaǵy ár atalym boıynsha jeńimpazdarǵa osy ýaqytqa deıin 29 arnaýly tehnıka tabystalypty. Bul óńir jurtynyń qorshaǵan orta tazalyǵyn saqtap, aınalasyn abattandyrýǵa aıryqsha mán beretinin baıqatsa kerek.
Aksııa aıasyndaǵy ár apta tyndyrymdy istermen túıindelip turdy. «Jasyl aımaq» aptalyǵynda áýejaıdan oblys ortalyǵyna jetkizer kúre jol boıyndaǵy «Rámizder alańynda» tal egildi. Oblys ákimi N.Nálibaev pen óńirde saparda júrgen senatorlar qatysqan senbilikte boı kótergenine kóp bolmaǵan alań aýmaǵy kóshettermen kómkerildi. Osy kúni jańadan shańyraq kótergen 10 otbasy byltyr ǵana el ıgiligine berilgen Otbasy ortalyǵy alańyna aǵash kóshetterin otyrǵyzdy. Jańa ómir bastaǵan jastardyń bul bastamasyn jurtshylyq jyly qabyldady. Shıeli aýdanyndaǵy «Rý-6» men «Semizbai-U» seriktestikteriniń qyzmetkerleri mekeme aýmaǵyn abattandyryp, 500 túp aǵash ekti. Barlyq aýdan men aýylda jalǵasqan «Jasyl aımaq» aptalyǵy nátıjesinde óńirde 7 myńnan asa tal otyrǵyzylǵany belgili boldy.
Jalpy, qysy qatal, jazy aptap Syrda tal-daraq egýge erekshe qaraıdy. Bıyl oblys ortalyǵynan 2 gektarlyq jer arshylyp, 3 tuqymbaq ázirlenip jatyr. Qyzylorda–Astana baǵytynda salynyp jatqan basty joldyń qos qaptalyna da jasyl beldeý qalyptastyrylady.
Tutas eldi qamtyǵan aksııa qorytyndysyndaǵy «Móldir bulaq» aptalyǵy da Syrda erekshe ótti. Oǵan memlekettik mekemeler, jeke uıym ókilderi, jastar men volonterler, turǵyndar qatysyp, barlyǵy 245 tehnıka jumyldyryldy. Onyń aıasynda Syrdarııa ózeniniń jaǵalaýy, «Aqqumshyq» jaǵajaıy, «Káribóget» kópiri, «Laıkól», «Qambash», «Jalańash», «Shómishkól», «Raıym», «Tushy», «Iirkól», «Qaraózek», «Álimkól», «Jamankól» kólderi men «Qalǵandarııa», «Eltaı», «Shirkeıli» arnalarynyń jaǵalaýy qoqystan, turmystyq qaldyqtan tazartyldy. Sý aıdyndary men aıaqsý aryqtarynan 40 tonnadan asa qoqys polıgondarǵa jetkizildi.
Oblysta kún jylyp, jer jibigennen-aq eki aılyq sanıtarlyq tazalyq, kórkeıtý-kógaldandyrý sharasy bastalǵan edi. Naýryzdan mamyr aıyna deıin sozylatyn eki aılyq aıasynda da 35 myń túp saıaly aǵash egildi. Olarǵa oblys ortalyǵynda jańadan qurylǵan «Jasyl-Qyzylorda» mekemesi kútim jasaıdy.
QYZYLORDA