Buqar jyraý mýzeıine qarapaıym aýyl turǵyny 1941 jyly jaryq kórgen «Qazaq ádebietj» (Qazaq ádebıeti) hrestomatııasyn tapsyrdy. Latyn qarpindegi bul oqý quraly orta mekteptiń 9-synybyna arnap shyǵarylǵan eken.
Kóne oqýlyq Almaty qalasyndaǵy qazaqtyń birikken memlekettik baspasynan shyqqan. Qurastyrýshysy – ádebıet zertteýshisi, keıin fılologııa ǵylymynyń doktory, Ulttyq ǵylym akademııasynyń korrespondent múshesi, Qazaq KSR eńbek sińirgen ǵylym qaıratkeri bolǵan Esmaǵambet Ysmaıylov.
Bul kitap-oqýlyqtyń ereksheligi – munda keńes zamanynyń alǵashqy jyldary shyǵarmashylyǵyna tyıym salynyp, esimderin el aıtýǵa qoryqqan tulǵalarymyzdyń ádebı dúnıeleri jaryq kórgen.
Hrestomatııada Ybyraı Altynsarın, Abaı Qunanbaıuly, Sháńgereı Bókeev, Aqan seri Qoramsauly, Narmambet Ormambetuly, Nurjan Naýshabaev, Máshhúr Júsip Kópeev, Ǵumar Qarash, Spandııar Kóbeev, Sultanmahmut Toraıǵyrov, Sábıt Dónentaev, Yǵylman Shórekov, taǵy basqa ádebıet ókilderiniń, jalpy sany 20 aqyn-jazýshynyń shyǵarmalary basylǵan.
Jádiger-kitapty mýzeıge Aqtoǵaı aýdany Mútkenov aýylynyń turǵyny, zeınetker Nurash Beısembaeva tapsyrdy. Nurash Muqajanqyzynyń aıtýynsha, hrestomatııany aýyldyq mektepte uzaq jyldar ustazdyq etken Júsip Tóleýtemirov atty el aǵasy saqtap kelipti. Keıin mektep kúrdeli jóndeýden ótken ýaqytta eski oqýlyqtar arasynan tabylǵan.
Pavlodar oblysy