Keshe elimiz Parlamenti Senatynyń Tóraǵasy Qasym-Jomart Toqaev Latvııa Respýblıkasynyń Qazaqstandaǵy Tótenshe jáne ókiletti elshisi Alberts Sarkanıspen kezdesti, dep habarlady osy palatanyń baspasóz qyzmeti.
Kezdesý barysynda Qazaqstan Senatynyń basshysy A.Sarkanıstiń Latvııanyń elimizdegi dıplomatııalyq mıssııasy basshylyǵyna taǵaıyndalýy eki el yntymaqtastyǵyna jańa serpin ákeletinine senim bildirdi.
Tóraǵa “Latvııa shyn máninde Qazaqstannyń Baltyq aımaǵyndaǵy negizgi saıası ári ekonomıkalyq áriptesi bolyp tabylady. Astana Rıgamen barlyq salalar men deńgeılerdegi dıalogty, onyń ishinde parlamentaralyq baılanystardy damytý men nyǵaıtýdy odan ári ilgeriletýge múddeli”, – dep atap ótti.
Kezdesýde EQYU men osy Uıymnyń Parlamenttik Assambleıasyn qosa alǵandaǵy halyqaralyq jáne parlamentaralyq qurylymdar aıasyndaǵy ózara is-qımyldar máseleleri boıynsha jan-jaqty pikir almasyldy. Alberts Sarkanıs Qazaqstannyń EQYU tóraǵalyq qyzmetin joǵary baǵalap, osy mıssııanyń sátti ótetinine senim bildirdi.
Elshiniń ótinishi boıynsha Qasym-Jomart Toqaev Qyrǵyzstandaǵy ahýal boıynsha qazaqstandyq ustanymdar týraly aıta kelip, jeke oılarymen bólisti. Ol aımaqtaǵy jaǵdaıdyń shıelenisýine qatty alańdaýshylyq bildirip, qalyptasqan daǵdarysty tez arada retteýdiń, zorlyq-zombylyq pen qantógistiń toqtatylýy qajettigin atap kórsetti.