AQSh-tyń Plant-sıtı qalasynda otandasymyz, kásipqoı boksshy Batyr Júkembaev kezekti jekpe-jegin ótkizdi. Bylǵary qolǵap sheberleriniń shaıqasy ýaqytynan buryn aıaqtaldy, dep jazady Egemen.kz Vesti.kz-ke silteme jasap.
10 raýndqa josparlanǵan jekpe-jektiń túıinin Batyr Júkembaev (23-1, 16 KO) 5-shi raýndta sheshti. Ol ýkraınalyq Ivan Redkachty (24-6-1, 19 KO) osy kezeńde tehnıkalyq nokaýtqa jiberdi.
Boksshylar jartylaı orta salmaqtaǵy WBA Continental North Americas tujyrymy boıynsha judyryqtasty. Bul belbeý Batyr Júkembaevtyń qanjyǵasyna 2018 jyly baılanǵan edi. Otandasymyz bul joly da bedeldi belbeýdi ózinde saqtap qaldy.Aıta keteıik, buǵan deıingi tıtýldyq jekpe-jekte Batyr Júkembaev álem chempıony, fransýz Mohamed Mımýnnen (23-6, 4 KO) basym ekenin dáleldegen edi.