Keshe Memleket basshysy Nursultan Nazarbaev Premer-Mınıstr K.Másimovtiń, Prezıdent Ákimshiliginiń Basshysy A.Mýsınniń, Qaýipsizdik Keńesiniń hatshysy M.Tájınniń qatysýymen jumys keńesin ótkizdi, dep habarlady Qazaqstan Respýblıkasy Prezıdentiniń baspasóz qyzmeti.
Keńeste Premer-Mınıstr K.Másimovtiń elimizdiń áleýmettik-ekonomıkalyq damýynyń aǵymdaǵy nátıjeleri, sondaı-aq ındýstrııalyq-ınnovasııalyq damý strategııasyn iske asyrý týraly esebi tyńdaldy. Osy kezeńde IJО́ ósimi 8,3 %-dy qurady.
Kezdesý barysynda Qaýipsizdik Keńesiniń hatshysy M.Tájın elimizdiń Prezıdentin Máskeýde 14 maýsymda bolyp ótken Ujymdyq qaýipsizdik týraly shart uıymyna (UQShU) qatysýshy elderdiń Qaýipsizdik Keńesi hatshylarynyń Qyrǵyzstandaǵy ahýaldy retteý týraly tótenshe konsýltasııalary jaıynan habardar etti.
Búginde UQShU Qyrǵyzstandaǵy jaǵdaıdy turaqtandyrýda jáne retteýde mańyzdy ról atqarýǵa qabiletti barynsha yqpaldy uıym bolyp tabylady.
Kezdesýdiń qorytyndysy boıynsha Nursultan Nazarbaev birqatar naqty tapsyrmalar berdi.
Keńes aıaqtalǵannan keıin Qazaqstan Prezıdenti qysqasha málimdeme jasady:
– Biz alǵashqy jartyjyldyqtyń aldyn ala qorytyndylaryn talqyladyq. Biz qarjy júıesin turaqtandyryp, qaryzdardy qaıta qurylymdaǵanymyzdy qanaǵattanarlyqpen atap ótemin. Investısııalar boıynsha da, sol sekildi banktik júıe boıynsha da qazir Qazaqstanǵa qyzyǵýshylyq arta túsýde.
Indýstrııalyq-ınnovasııalyq damý baǵdarlamasy boıynsha bıylǵy jyly 144 nysan, sonyń ishinde birinshi jartyjyldyqta 72 nysan paıdalanýǵa beriledi. Olardyń barlyǵy ekinshi jartyjyldyqta iske qosylyp, jumys isteı bastaıdy.
Qazirgi kezde ekonomıkanyń óńdeý salasynyń kólemi artyp kele jatqany qýantady. Bıýdjettiń kiris bóligi tolyǵa túsýde. Inflıasııa belgilengen sheginde. Jumyssyzdyq deńgeıi ósip otyrǵan joq, tómendep keledi.
Bul ekonomıkanyń ósýimen adamdardyń ál-aýqaty jaqsara túsetinin bildiredi.
Biz talqylaǵan ekinshi másele, bul – Qyrǵyzstandaǵy ahýal. Ol bizdiń jaqyn kórshimiz. Qazaqstan bul memlekette jaǵdaıdy turaqtandyrýǵa ábden múddeli.
Soraqylyqpen qan tógilýge jol berildi. Biz onda qaza bolǵan barlyq adamdardyń týystaryna kóńil aıtamyz.
Qazaqstan barlyq múmkin bolatyn kómekti kórsetedi. Biz óz is-áreketimizdi, ásirese kórshiles eldermen – Reseımen jáne О́zbekstanmen tyǵyz úılestirip otyramyz.
Bizdiń elderimizdiń Qaýipsizdik Keńesiniń hatshylary biz qabyldaıtyn naqty sharalardy anyqtaý úshin Qyrǵyzstandaǵy ahýalǵa saraptama júrgizýine ýaǵdalastyq. Bul jumysty Qyrǵyzstannyń Ýaqytsha úkimetimen birlesip júrgizemiz.
Men halyqaralyq uıymdar, ózge elder tarapynan Qyrǵyzstanǵa gýmanıtarlyq kómek kórsetý máselesi týraly bastama kóteremin. Degenmen, kómek kórsetkender onyń mejeli meken-jaıǵa deıin baratynyna senimdi bolýlary tıis. Bul rette bizge ózimizdiń is-áreketterimizdi úılestirip otyrý da kerek.
Búginde EQYU ókili J.Káribjanov sonda jumys isteýde. Sondaı-aq BUU-nyń, Qyzyl Krestiń jáne basqa uıymdardyń ókilderi jumys istep jatyr. Barlyǵy da osy eldegi jaǵdaıǵa alańdaýly. Qyrǵyzstannyń Ýaqytsha úkimeti men qyrǵyzdardyń ózderi el ishindegi jaǵdaıdy turaqtandyratynyna úmit artamyz.
Men qaqtyǵystarǵa jol berýshi barlyq tarapty qarýdy jıyp qoıyp, kelissóz ústeline otyryp, barlyq qalǵan máseleni birlesip sheshýge shaqyramyn.