Jaıyq ózeniniń deńgeıi Mahambet aýdanynda áli kóterilip jatyr. Bul aýdanda sý aıdyny 850 sm bolyp belgilengen qaýipti shekten asyp, aýyldarǵa oqtyn-oqtyn qaýip tóndirip tur. Keshe saǵat 12.00-de qaýipti shekten 170 santımetrge ulǵaıdy.
Batyr atyndaǵy aýdannyń 9 okrýgine qaraıtyn 21 eldi mekende 30 940 adam turady. Jaıyq ózenine jaqyn ornalasqan 17 aýyldyń mańynda 105 shaqyrym bóget salynǵan. Sý arnasyna taıaý ornalasqan aýyldyń biri – Jalǵansaı. Bul eldi meken aýdan ortalyǵy Mahambet aýlynan 15 shaqyrym qashyqta ornalasqan. Munda 237 tútin, 1 286 turǵyn bar.
Burnaǵy kúni jurt uıqyda jatqan mezgil saǵat 23.40-ta aýyl shetindegi bógetti tasqyn sý jaryp ketti. Sol sátte aýyldaǵy dárigerlik pýnktti sý basý qaýpi tóndi. Tosyn jaıt týraly habar jetisimen oblys ákimi Serik Shápkenov te, aýdan ákimi Qaırat Nurlybaev ta Jalǵansaıǵa jedel jetti.
Túngi saǵat 01.20-da dabyl belgisi iske qosyldy. Biraq turǵyn úılerge qaýip tónbedi. Soǵan qaramastan qaýipsizdik maqsatynda turǵyndardy aýyldaǵy bilim ordasyna, aýdan ortalyǵyndaǵy D.Tólenov, E.Aǵeleýov atyndaǵy orta mektepter men «Nurshýaq», «Altynaı» balabaqshalaryn evakýasııalaý bastaldy. Arnaıy bólingen kóliktermen Mahambet aýlyna 154 adam evakýasııalandy. Osyndaǵy D.Tólenov atyndaǵy orta mektepke 143 adam ornalastyryldy. Al 46 adam týystarynyń úıine barýdy qup kórdi.
Al Jalǵansaı aýlynda túnimen jarylǵan bógetti biteý, nyǵaıtý jumysy júrgizildi. Oǵan aldymen Qorǵanys mınıstrligine qaraıtyn áskerı bólimnen 50 sarbaz ben 15 tehnıka tartyldy. Bul jumysqa aýyldyń jigitteri de jumyldy. Birlesken istiń nátıjesinde tańǵy saǵat 04.20-da sý jarǵan bóget tolyqtaı qalypqa keltirildi.
Keshe tańerteń saǵat 08.00-de Jalǵansaı aýylynyń turǵyndarynyń úıine oralýyna ruqsat berildi. О́ıtkeni aýylǵa tasqyn sýdan tóngen qaýip seıildi. Degenmen aýylda bógetti bekitý jumysy áli de júrip jatyr. Osy maqsatqa 842 qyzmetker, 84 tehnıka, 21 qaıyq bólindi.
Bul aýdandaǵy Mahambet, Sarytoǵaı, Saraıshyq aýyldaryna qaýip tolyq seıildi deýge bolmaıdy. Al Taldykól aýyly birneshe kúnnen beri tasqyn sýdyń ortasynda tur. Quddy teńiz tórindegi aral sekildi.
Aýdandyq evakýasııalyq komıssııa múshesi Venera Qabyshevanyń aıtýynsha, sý tasqynyna baılanysty 22 evakýasııalyq pýnkt ashylǵan. Onyń 18-i aýyldardaǵy bilim oshaqtarynda ornalasqan. Bul pýnktterde 16 myńǵa jýyq adam qabyldanady. Atalǵan pýnktter tósek jabdyqtarymen birge, aýyzsý, alǵashqy medısınalyq kómek kórsetýge qajetti dári-dármekter qorymen qamtylǵan.
Aýdandyq ortalyq aýrýhanasy dırektorynyń mindetin atqarýshy Serjan Sandybaevtyń deregine súıensek, dári-dármektiń eki aılyq qory jasaqtalyp tur. Qaýipti aýmaqtaǵy Saraıshyq, Taldykól aýyldaryndaǵy ambýlatorııalardan vaksınalar aýdan ortalyǵyna alynǵan. Maqsat – vaksınalardy saqtaý tártibiniń buzylýyna, jaramdylyq jaǵdaıynyń búlinýine jol bermeý.
«Sý tasqynyna baılanysty qaýip tóner bolsa, jedel brıgadalar men medısınalyq kómek pýnkti qyzmet kórsetedi. Osy maqsatta aýrýhanada 50 tósek orny daıyndaldy. Bul aýyr naýqastardy kútimge alyp, dárigerlik kómek kórsetýge arnalyp otyr», deıdi S.Sandybaev.
Jaıyq ózenindegi sý deńgeıi Atyraý qalasynda qaýipti shekten áldeqashan asqan. Keshe munaıly shahar tusynda sý deńgeıi – 586, oǵan jaqyn ornalasqan Jańatalap aýylynda – 424, Erkinqala eldi mekeninde 450 sm boldy.
Tasqyn sý Jaıyq ózeniniń eki jaǵynan Atyraýǵa keletin eki joldyń jıegine tirelip tur. Onyń álegi, ásirese, Atyraý-Inder tasjolyndaǵy ahýaldan baıqalyp otyr. Jaıyq ózeninen jazyq dalaǵa jaıylǵan sýdan atalǵan jolǵa bir emes, eki ret qaýip tóndi. Alǵashqysynda joldyń asfalty oıylyp qaldy.
Atyraý oblystyq jolaýshylar kóligi jáne avtomobıl joldary basqarmasy baspasóz qyzmetiniń málimetinshe, bul joldyń kúrdeli jóndeýden soń qoldanysqa berilgenine 10 jyl ótken. Oblystyq mańyzy bar tasjoldyń uzyndyǵy – 174 shaqyrym. Atyraý qalasynan Mahambet aýdanynyń aýmaǵymen ótip, Inderbor kentine deıin barady. Burnaǵy kúni keshte atalǵan jol taǵy jabyldy. Sebep – sý ótkizetin qubyr salý qajettigi.
«Buǵan deıin Atyraý-Inder tasjolyna sý ótkizetin 6 qubyr salynǵan edi. Alaıda ór sýynyń kóterilý deńgeıiniń toqtamaýyna baılanysty atalǵan tasjol boıyna taǵy da osyndaı 6 qubyr salý qajettigi týyndady. Sol sebepten 22 mamyrda keshki saǵat 21.00-de «Atyraý-Inder» tasjoly ýaqytsha jabylady. Qubyr ornatý jumysy shamamen 24-30 saǵatqa sozylady», dep habarlady oblystyq jedel shtabtan.
Osyndaı sebeptermen Atyraý qalasynda turǵyndardy ornalastyratyn 94 evakýasııa pýnkti daıyn tur. Evakýasııa pýnktterinde 10 250 oryn bar.
Oblystyq densaýlyq saqtaý basqarmasynyń basshysy Qaısar Abdalıevtiń aıtýyna qaraǵanda, evakýasııalyq pýnktterdiń bárinde medısınalyq kezekshi brıgadasy quryldy. Al oblystyq ınfeksııalyq aýrýhanada qosymsha 200-den asa rezervtik oryn daıyndaldy.
«Biz tasqyn sýdan qaýip bolǵan jaǵdaıda modýldik aýrýhanany jumyldyramyz. Tasqynǵa baılanysty ahýal qıyndaıtyn bolsa, Atyraýǵa 100-den asa dárigerlerdi tartý jóninde sheshim qabyldandy», dedi Q.Abdalıev.
Onyń málimetinshe, oblysta 52 jedel járdem kóligi bar. Onyń 30-y Atyraý qalasynda, al 22 kólik aýdandarǵa bólingen. Buǵan qosa medısınalyq mekemeler arasynda naýqastardy tasymaldaý úshin rezervtik 11 kólik qarastyryldy.
О́ńirdegi qutqarýshylarda Mahambet aýdanynyń Jaıyq jaǵasynda ornalasqan 13 eldi mekende kezekshilik atqaryp júr. Olar 19 mamyr keshki saǵat 20.00-den 20 mamyr kúngi tańerteńgi saǵat 08.00-ge deıin Mahambet pen Sarytoǵaı aýyldary aralyǵynda 132 turǵyndy qaıyqpen tasymaldady. Onyń ishinde 11 bala men 1 júkti áıel bar. Qalǵany qaıyqpen tasymaldandy», dep habarlady departamenttiń qoǵammen baılanys toby.
Al 22 mamyrda Atyraý qalasynyń irgesindegi Qaıyrshaqty aýyldyq okrýginde tirkelgen sharýa qojalyǵynyń jetekshisi qutqarýshylardyń kómegine júgindi. О́ıtkeni qojalyqtyń 4 úıirdegi 80 jylqysy tasqyn sýdyń ortasynda qalǵan. Qutqarýshylar qylquıryqtylardy qaýipsiz jerge aıdap shyǵardy.
Atyraý oblysy