Jetisýda «Taza Qazaqstan» ekologııalyq aksııasy áli de jalǵasyp jatyr. Búginde oblys turǵyndary, volonterler, jastar uıymdary, medısınalyq jáne bilim mekemeleriniń qyzmetkerleri, sonymen qatar óńir sportshylary men ónerpazdary, jalpy 117 myńnan asa adam atsalysyp, 860 tehnıka jumyldyryldy.
Jetisýda bekitilgen jelilik kestege sáıkes «Taza ólke», «Kıeli meken», «Jasyl aımaq», «О́negeli urpaq», «Móldir bulaq» aptalyqtarynda «Tazalyq tabaldyryqtan bastalady», «Taza qala Taldyqorǵan», «Meniń taza mektebim», «Bulaq kórseń, kózin ash», «Taza ózen», «Tazalyq ózimizden bastalady» syndy birqatar aksııa uıymdastyryldy. Ekologııalyq aksııalar nátıjesinde 5 338 tonna qoqys shyǵarylyp, 2 200 km aryq jelisi tazalandy. Oǵan 763 kásiporyn men 1 291 áleýmettik nysan atsalysty. Oblys aýmaǵynda aksııa kezinde 29 514 túp aǵash otyrǵyzyldy.
Elimizde stıhııalyq qoqys oryndary men kólemi spýtnıktiń kómegimen, aero túsirilim arqyly anyqtalǵan edi. Qazir mamandar sol oryndardy tazartý jumysymen aınalysyp jatyr. Jalpy, stıhııalyq qoqys oryndaryn retke keltirý is-sharalary merdiger mekemelerdiń kúshimen jyl boıy atqarylmaq.
Oblys ortalyǵy boıynsha atalǵan jumysty «Jaksymbet» JShS júzege asyrady. Jyl basynan beri oblys ortalyǵynda 12 oryn anyqtalyp, 273 tekshe metr qoqystan tazartyldy. Búginde 2 stıhııalyq qoqys ornynda tazalyq jumysy júrgizilip, 35 tekshe metr qoqys shyǵaryldy.
«Biz bir aıdan asa ýaqyt kóleminde qalanyń ishi-syrtynda tazalyq jumysyn júrgizip jatyrmyz. Soǵan saı arnaıy tehnıka kúshi jumyldyryldy. Jetisýlyqtar birlese eńbek etip, qala kórkin jandandyrýǵa atsalysyp jatyr. Taza qala – eldiń kórki», deıdi qala ákimi Ernat Bázil.
Sonymen qatar qalanyń 100-ge jýyq erikti, stýdentter men «Jetisý jastary» ortalyǵynyń qyzmetkerleri qala kóshelerin turmystyq qoqys pen bos bótelkelerden tazartty. Tazalyq aksııasy barysynda jınalǵan qoqystar qaıta óńdeý ortalyqtaryna jiberiledi. Jastardyń josparyna sáıkes qaıta óńdeýden túsken qarajat Balalar kúni merekesine oraı, baldyrǵandarǵa merekelik kóńil kúı syılaýǵa jumsalady.
Jetisý oblysy