Jeksenbide Parıjde «Úlken dýlyǵa» sanatyndaǵy eń iri jarystardyń biri – «Rolan Garros» bastalady. Júlde qory 53,5 mln eýrony quraıtyn dúbirli dodada álemniń eń úzdik tennısshileriniń barlyǵy baq synaıdy. Bul týrnır 9 maýsymǵa deıin sozylady.
«Rolan Garrostyń» 133 jyldyq tarıhy bar. Atalǵan týrnırdiń tusaýy sonaý 1891 jyly kesildi. Sol kezden beri jaqsylar men jaısańdardyń talaıy Parıj korttarynda óreli ónerimen dúıim jurtty qýantty. Solardyń arasynan Rafael Nadaldi bóle-jara ataýǵa bolady. Ispanııanyń maqtanyshy 2005-2022 jyldar aralyǵynda uıymdastyrylǵan 14 jarysta aldyna jan salǵan joq. Osyndaı orasan zor tabysynyń arqasynda jankúıerler Nadaldi «Grýnt koroli» dep atady.
HH ǵasyrdyń alǵashqy jartysynda Fransııanyń qos sańlaǵy – Maks Dekıýjı men Anrı Koshe jasyndaı jarqyldady. Alǵashqysy – segiz, ekinshisi bes retten bas júldeni oljalady. Jetpisinshi jyldary shvesııalyq Born Borgtyń dańqy dúrkiredi. Skandınavııalyq sańlaq alty týrnırde top jardy.
Áıelder arasyndaǵy eń úzdik kórsetkish Krıs Evertke tıesili. 1974-1986 jyldar aralyǵynda AQSh tennısshisi jeti márte teńdessiz dep tanyldy. Fransııalyq Sıýzan Lenglen (1920-1926) men germanııalyq Shteffı Graff (1987-1999) alty retten dara shyqty.
Byltyr ótken jarysta erler arasynda Novak Djokovıch jeńimpaz atandy. Serbııanyń sańlaǵy fınalda norvegııalyq Kasper Rýýdty qapy qaldyrdy – 7:6, 6:3, 7:5. Áıelder saıysy polshalyq Iga Sventektiń jarqyn jeńisimen aıaqtaldy. Álemniń birinshi raketkasy aqtyq synda chehııalyq Karolına Mýhovadan aılasyn asyrdy – 6:2, 5:7, 6:4.
«Rolan Garrosta» Qazaqstannyń birde-bir tennısshisi úzdik tórttiktiń qatarynan kórine alǵan joq. Kezinde Iаroslava Shvedova (2010, 2012) eki ret shırek fınalda oınady. Keıinnen Iýlııa Pýtınseva (2016, 2018) men Elena Rybakına da (2021) dál sol mejeden kórindi. О́zge myqty tennısshilerimiz ekinshi aınalymnan asa alǵan joq. Iá, 2015 jyly Shvedovanyń aqtyq synǵa deıin alqynbaı jetip, fınalda óner kórsetkeni ras. Biraq bul kórsetkishke ol juptyq saıysta qol jetkizdi.
Bıyl Elena Rybakına men Iýlııa Pýtınseva, Aleksandr Býblık pen Aleksandr Shevchenko Parıjdegi dodanyń negizgi bóligine birden joldama aldy. О́ıtkeni olardyń reıtıngteri – joǵary. Taǵy tórt otandasymyz irikteý týrnırine qatysty. О́kinishke qaraı, úsheýiniń joly bolmady. Tusaýkeser kezdesýlerinde Beıbit Juqaev argentınalyq Hýan Manýel Cherýndoloǵa, Dmıtrıı Popko fransııalyq Valentına Roıege, Denıs Evseev bolgarııalyq Adrıan Andreevke ese jiberdi. Olarǵa qaraǵanda Mıhaıl Kýkýshkın táýir oınap jatyr. Jerlesimiz shveısarııalyq Leandro Rıdı men aýstralııalyq Lı Týdy tize búktirip, fınalǵa shyqty. Endi Kýkýshkın taǵy bir básekede jeńiske jetse, onda ol da «Rolan Garrosqa» qatysady. Al Anna Danılına men Aleksandr Nedovesov juptyq básekelerde baq synaıdy.
«Rolan Garrostyń» jekelegen saıysyndaǵy tennısshiler tabysy:
Birinshi kezeń – 73 myń eýro;
Ekinshi kezeń – 110 myń eýro;
Úshinshi kezeń – 158 myń eýro;
Tórtinshi kezeń – 250 myń eýro;
Shırek fınal – 415 myń eýro;
Jartylaı fınal – 650 myń eýro;
Fınalıst – 1,2 mln eýro;
Jeńimpaz – 2,4 mln eýro.
Juptyq saıystaǵy syıaqy: jeńimpaz – 590 myń eýro, fınalıst – 295 myń eýro.
Aralas juptar saıysyndaǵy syıaqy: jeńimpaz – 122 myń eýro, fınalıst – 61 myń eýro.